Як Крэмль выдае старыя відэа з Пуціным за новыя сустрэчы, у тым ліку і перад сустрэчай з Уіткафам
Доказы таго, што Крэмль падае загадзя запісаныя відэа з Уладзімірам Пуціным — «кансервы» — як свежыя, знайшла «Сістэма», расследавальніцкі праект «Настоящего времени» і «Радыё Свабода».
У кабінеце Уладзіміра Пуціна ў Сенацкім палацы Крамля паміж 17 і 24 лютага 2025 году адбыліся незаўважныя на першы погляд змены. На кніжных паліцах за ягонай спінай, якія трапляюць у аб’ектывы камер у часе прыёмаў, памянялі расстаноўку кніг: з'явіліся новыя выданні, а Канстытуцыя Расіі перамясцілася з правай часткі шафы ў левую.
Да гэтага раскладка кніг мянялася толькі нязначна. Фота з ранейшай раскладкай можна знайсці на здымках 2016 году, яна ж зафіксаваная на панарамнай здымцы кабінету, якую ў 2019-м апублікавала выданне Life, піша «Система».
Пасля лютага 2025 году Пуцін больш за сорак разоў прымаў у сваім кабінеце губернатараў, міністраў і кіраўнікоў дзяржаўных кампаніяў. Прынамсі на адным кадры пратакольнай здымкі з гэтых сустрэч можна разгледзець новую кніжную раскладку.
Аднак у пяці выпадках раскладка кніг нібы вярнулася да ранейшага парадку.
Гэта можа быць прыкметай таго, што Крэмль выдаваў за актуальныя падзеі загадзя падрыхтаваныя запісы, зробленыя да 24 лютага, — гэта значыць публікаваў так званыя «кансервы».
Выкарыстанне загадзя падрыхтаваных запісаў для публікацыі ў іншы дзень — даволі распаўсюджаная практыка Крамля. Часам гэта звязана з здароўем Пуціна, часам — з ягоным жаданнем адпачыць ад публічнасці.
Калі паглядзець на публічныя захады з удзелам Пуціна з 2 па 10 красавіка 2025 году, кідаецца ў вочы брак групавых сустрэч і масавых падзеяў. Але пры гэтым выйшлі чатыры відэа, якія, як падазраюць расследавальнікі, запісваліся ў іншы дзень. На людзях за межамі Крамля Пуцін з'явіўся толькі 11 красавіка, калі ў Санкт-Пецярбургу ён прыняў спецыяльнага прадстаўніка прэзідэнта ЗША Стыва Уіткафа.
Выкарыстанне яшчэ адной «кансервы» ў траўні можа быць звязана з асабістым жыццём Пуціна. Рэч у тым, што 12 траўня, калі Пуцін нібыта сустракаўся з губернатарам Іванаўскай вобласці Станіславам Васкрасенскім, свой 42-гі дзень нараджэння святкавала Аліна Кабаева, шматгадовая партнёрка Пуціна і маці яго сыноў (і тое, і другое Крэмль спрабуе трымаць у сакрэце).
Цяпер чытаюць
У Мінску масажыст Андрэй таемна здымаў голых кліентак12
Каментары