У Беларусь прыедзе Віктар Януковіч. На ўсякі выпадак рыхтуюцца да візіту і ў вёсцы Янукі Докшыцкага раёна, адкуль паходзіць Януковічаў дзед.
На ўказальніку -- ці то кіламетраж, ці то колькасць жыхароў?
Янукі. Экскаватарам тут закопваюць падмуркі разбураных хат.
Гэтая хата нежылая, але свежапафарбаваная і з фіранкамі.
Марыя Януковіч, адна з апошніх жыхарак вёскі.
На Янукоўскіх могілках спачываюць продкі ўкраінскага прэзідэнта.
Ад маёй вёскі Завараты, што ў Глыбоцкім раёне, да Янукоў каля дзесяці кіламетраў. Паехалі мы на роварах, бо іншай тэхнікай тут праехаць складана.
Дарога ідзе па тэрыторыі трох раёнаў, а між раёнамі дарог у нас амаль няма.Праехалі мы дзесяць кіламетраў, на шляху сустрэлі толькі двух чалавек (адзін з якіх ляжаў п’яны пры дарозе), і адзін аўтамабіль — вёз рабочых з Янукоў.
Наша мясцовасць ляжыць на мяжы Глыбоцкага, Пастаўскага і Докшыцкага раёнаў, раней гэта была адна адміністрацыйная адзінка. Зараз паўсюль пануе запусценне, у большасці вёсак жыве чалавек па дзесяць.
Праходзіць тут самы грэбень Свянцянскай грады, па якой пралягае водападзел паміж Нёманам і Дзвіной. Мясціны тут прыгожыя, але землі не вельмі ўрадлівыя. Таму тут і былі ў асноўным невялікія вёскі, але недалёка адна ад адной. Да райцэнтраў далекавата, гэта адна з галоўных прычын, чаму людзі адсюль з’яжджаюць.
У вёсцы Струкі, якая да
Ужо на пад’ездзе да яе чуваць гуд тэхнікі, у паветры стаіць ад яе чад.Непадалёк ад скрыжавання з докшыцкай дарогай экскаватар і бульдозер прыбіраюць рэшткі фермы. Асноўная частка работ па добраўпарадкаванні была зроблена яшчэ ў мінулы прыезд Януковіча, у 2003 годзе, але яшчэ стаяла воданапорная вежа з буслянкай і сянажныя траншэі. Зараз бураць і гэта. Па словах мясцовай жыхаркі Марыі Януковіч, буслянку гэту ніхто не хацеў прыбіраць, бо ў народзе вераць: хто пакрыўдзіць бусла, накліча на сябе бяду. Але загад ёсць загад, некалі бурылі храмы, дзе ж ужо тут думаць пра бусла…
Пад’язджае начальнік забіраць механізатараў, цікавіцца, хто такія, чаго фатаграфуем. Мы ў сваю чаргу пытаемся, ці чакаюць яны высокага госця з Украіны.
«Прамога ўказання няма, але на ўсякі выпадак рыхтуемся»,— адказвае.
Ад скрыжавання да Янукоў два кіламетры, тут відаць ажыўленне, дарога раўняная грэйдэрам, бялеюць свежыя пні зрэзаных дрэў, дымяцца кучы галля. Але ля магілак з навядзеннем парадку, відаць, перастараліся. Нам сустрэўся стары з вядром, які гасіў упаленае дупло ў сасне. Дарэчы, калі я вяртаўся дадому, яно зноў угарэлася. Вакол магілак чарнее спаленая трава, месцамі стаіць абгарэлы ядловец.
— А хто гэта так тут усё папаліў? — пытаюся ў мясцовага жыхара.
— А былі тут з сельсавета…
Што цікава,
за падпал сухой травы можна атрымаць штраф да 40 базавых, але начальства, відаць, гэта не тычыцца.Ды і наогул, на тэрыторыі Пастаўскага і Докшыцкага раёнаў гэтай забароны не вельмі прытрымліваюцца. Да райцэнтраў далёка…
У Януках я не быў паўгода, таму змены адразу кідаюцца ў вочы. Паўразваленыя хаты зламалі, экскаватар закопвае падмуркі. Павыразаныя здзічэлыя слівы, падрэзаныя яблыні ў закінутых садах.
У першай ад дарогі хаце ніхто не жыве, аб чым сведчаць адарваныя драты электраперадач. Але вокны і калодзеж свежапафарбаваныя, на вокнах новыя фіранкі.
Мясцовая жыхарка Марыя Януковіч сустракае нас насцярожана: «Надакучылі тут ужо ездзіць і фатаграфаваць». «То чужыя надакучылі, — кажу. — А мы ж мясцовыя, таксама хочам пабыць у цэнтры падзей». «А што тут такога, проста наводзяць парадак», — кажа яна. На цётцы Марыі куртка з надпісам Ukraine і з украінскім трызубам. «Але ж куртка ў вас украінская», — звяртаю я ўвагу. «Ну, так, украінская." Спадарыня Марыя дзякуе Януковічу, што хоць нейкі тут навялі парадак, праўда, у адраджэнне Янукоў, у якіх жыве зараз два чалавекі, не верыць.
Варта адзначыць, што сам Віктар нарадзіўся не ў Януках, тут нарадзіўся толькі яго дзед, які выехаў на заробкі ў Данбас яшчэ ў 1914 годзе. На Янукоўскіх могілках пахаваны прадзед Януковіча, праўда, месца пахавання яго невядомае. Але ж прозвішча ва ўкраінскага прэзідэнта ўсё адно наша, беларускае, і тутэйшыя жыхары гэтым вельмі ганарацца. «Хоць нехта з нашых выбіўся ў людзі», — кажуць яны.
