Прапагандыст Рачылоўскі больш не выкладае ў мінскай гімназіі. Куды ён прыткнуўся цяпер?
Малады і адыёзны прапагандыст Мікіта Рачылоўскі настолькі дэманстраваў сваю адданасць рэжыму, што нават трапіў пад еўрапейскія санкцыі. Два гады ён працаваў настаўнікам у мінскай гімназіі №13, але цяпер звольніўся.
Зорка Мікіты Рачылоўскага заззяла на небасхіле беларускай прапаганды ў 2022 годзе. Тады 25-гадовага хлопца прызначылі кіраўніком Моладзевага парламента — ён нават атрымаў чырвона-зялёны букет з рук Наталлі Качанавай. Тады ж Мікіта стаў кіраваць моладзевым грамадскім аб'яднаннем «Рух наперад».
У 2023 годзе Мікіта як кіраўнік Моладзевага парламента катаўся ў «ДНР» і хваліўся тым, што заключыў дамову аб супрацоўніцтве з тамтэйшым Моладзевым парламентам.
У тым жа 2023 годзе Рачылоўскі стаў частым госцем ток-шоу на беларускім тэлебачанні. Ад імя беларускай моладзі ён асуджаў «нацыянал-здраднікаў». Яму даверылі весці праграму «Сенат» на СТБ і браць інтэрв'ю ў дэпутатаў.
Хлопец нават абяцаў памерці за Лукашэнку.
Летась у жніўні Рачылоўскі трапіў пад санкцыі Еўрасаюза. Але далей кар’ера забуксавала. У кастрычніку яго замянілі ў Моладзевым парламенце на Аліну Рацькову. На СТБ Рачылоўскага таксама апошні раз згадвалі ў жніўні 2024 года. На «РТР-Беларусь» яго працягвалі калі-некалі клікаць — напрыклад, каб пахваліць суботнікі.
Затое хлопец зганяў на Сусветны кангрэс антыфашысцкай моладзі і студэнтаў у Венесуэле, дзе насіў мерч з крамы Лукашэнкі.
Мікіта заставаўся кіраўніком таго самага «Руху наперад» (аб’яднанне ладзіла прапагандысцкія праекты кшталту «Пакаленне Першага», прысвечанага чарговым выбарам) і быў настаўнікам у сталічнай гімназіі №13. Даверылі яму весці прадмет «Мастацтва (айчынная і сусветная мастацкая культура)».
Цяпер Рачылоўскі абвесціў, што два тыдні таму звольніўся з гімназіі.
Мяркуючы па яго інстаграме, Рачылоўскі пасябраваў з былым паралімпійцам, а цяпер грамадскім дзеячам Аляксеем Талаем. З фондам Талая Рачылоўскі як кіраўнік «Руху наперад» падпісаў дамову аб супрацоўніцтве.
Аляксей Талай называе Мікіту не толькі сваім сябрам, але і «адным з найбольш перспектыўных будучых кіраўнікоў».
Апошнім часам Рачылоўскі актыўна піярыць мерапрыемствы з удзелам Талая і дзейнасць яго дабрачыннага фонду. Напрыклад, распавядае пра матывацыйную сустрэчу Аляксея з расійскімі вайскоўцамі, якім пасля вайны ампутавалі некаторыя часткі цела. У хэштэгах Рачылоўскі пазначыў #СВА і #Z.
Аб’ядноўвае мужчын не толькі тое, што яны абодва пад санкцыямі Еўрасаюза, але і знаходжанне ва ўкраінскай базе «Міратворац».
Ужо два тыдні Мікіта Рачылоўскі афіцыйна працуе намеснікам па развіцці міжнародных адносін і праектнай дзейнасці дабрачыннага фонду імя Аляксея Талая.
Кажа, што ў асноўным будзе займацца двума асноўнымі кірункамі: стварэнне рэабілітацыйнага цэнтра для дзяцей, а таксама рэалізацыя праекта «Жывая памяць удзячных пакаленняў» на тэрыторыі Расіі.
«Памерці за Лукашэнку». Хто такі Мікіта Рачылоўскі, новы твар прапаганды
Фонд Талая зноў перадаў гуманітарную дапамогу на акупаваныя тэрыторыі Украіны
«Перавыхоўваюць і мілітарызуюць». Для суда ў Гаазе падрыхтавалі даклад пра тое, хто і як вывозіць украінскіх дзяцей у Беларусь
Аляксей Талай развёўся з другой жонкай
Каментары