Пасольства Беларусі ў Варшаве стала прымаць дакументы толькі па запісе. Чаканне — каля 10 месяцаў
25 жніўня на дзвярах Пасольства Беларусі з'явілася новая абʼява: тут больш не прымаюць дакументы па жывой чарзе. Цяпер — толькі па папярэднім запісе, заўважыла ў сваім канале спецыялістка па рэлакацыі Кацярына Чахоўская, піша «Белсат».
«Не было проста і больш не будзе. Хто паспеў, той паспеў. Цяпер атрыманне пасведчання на вяртанне для ДНЖ стала яшчэ больш складаным. Няма ў мяне слоў для таго, каб апісаць эмоцыі наконт гэтай абʼявы, але я думаю ўсе ўсё зразумелі», — піша Кацярына Чахоўская.
Выключэнне зрабілі толькі для тых, хто страціў пашпарт падчас кароткай паездкі і тэрмінова вяртаецца дадому: яны могуць патрапіць у амбасаду па жывой чарзе.
«Грамадзяне, якія страцілі пашпарт падчас кароткатэрміновай паездкі за мяжу і якія жадаюць вярнуцца ў Беларусь у найкароткія тэрміны, могуць звяртацца ў прыёмныя гадзіны без запісу, у парадку жывой чаргі. Усе астатнія катэгорыі грамадзян (якія пастаянна ці часова пражываюць у Польшчы, маюць карту пабыту ці dowód osobisty, а таксама бацькі, якія выязджаюць з дзіцем без беларускага пашпарта, народжаным у Польшчы, прымаюцца толькі па папярэднім запісе», — абвяшчае папера на дзвярах амбасады.
Людзі сталі дзяліцца прыкладнымі тэрмінамі папярэдняга чакання ў гэтую паўпустую амбасаду: ад 8 да 10 месяцаў. Нагадаем, там беларусы не могуць падоўжыць пашпарт, атрымаць даведку ці зрабіць нешта яшчэ, чым занятыя звычайныя амбасады. Усё гэта забаранілі.
«Чаму на 8 месяцаў? Мне сёння прапанавалі запіс на чэрвень 2026-га. 10 месяцаў. Гэта проста правал», — пішуць у каментарах беларусы.
Зрэшты, некаму пашанцавала больш: напрыклад, на атрыманне пасведчання на вяртанне для дзіцяці запісалі праз тыдзень.
«25.08 напісала на пошту [email protected] з просьбай запісаць на атрыманне пасведчання на вяртанне для дзіцяці, учора даслалі адказ і далі запіс на 03.09. Але, магчыма, гэтак хутка даюць толькі запіс на такія пасведчанні. А датэлефанавацца да іх немагчыма», — дзеляцца «шчасліўчыкі» у каментарах.
Некаторыя людзі таксама знайшлі выйсце: замест амбасады ў Варшаве паехалі ў іншы горад, дзе патрэбную паперу выдалі дзень у дзень.
«Сутыкнуўся з праблемай, што прыйшлося атрымліваць пасведчанне на вяртанне ў Беларусь, для далейшай замены пашпарта. Прыехаў у Варшаву, там па папярэднім запісе, усё зладжана. Паехаў у Белую Падляску, там прынялі без запісу. Шукайце і знойдзеце, як той казаў», — дзеляцца лайфхакамі беларусы.
Цяпер чытаюць
Прабітыя лёгкія, разарваная печань і сэкс з малалетняй: што адбываецца ўнутры беларускай міліцыі і як начальства гэта хавае16
Прабітыя лёгкія, разарваная печань і сэкс з малалетняй: што адбываецца ўнутры беларускай міліцыі і як начальства гэта хавае
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім1414
Каментары