У Харкаве расійская армія трапіла ў прыватны дзіцячы садок, ёсць параненыя і загінулы. Тры выбухі прагучалі ў горадзе 22 кастрычніка, першы чулі а 10:52. Да гэтага Паветраныя сілы папярэджвалі пра тое, што ў кірунку Харкава ляцяць ударныя беспілотнікі, піша «Суспільне».
Усіх дзяцей з дзіцячага садка эвакуявалі, паведаміў гарадскі кіраўнік Ігар Церахаў.
У Харкаве ў выніку расійскай атакі двое мужчын і чацвёра жанчын атрымалі выбуховыя траўмы і ўдары, паведаміў кіраўнік АВА Алег Сінягубаў.
Пазней стала вядома, што 40‑гадовы мужчына загінуў. Агулам колькасць параненых — дзевяць чалавек.
Дзяцей з прыватнага садка, у які трапіў дрон, эвакуявалі, расказаў гарадскі кіраўнік Ігар Церахаў. Паводле яго слоў, ва ўстанове знішчаны другі паверх, пажар і выратавальная аперацыя працягваюцца.
Церахаў адзначыў, што сярод параненых — камунальнікі, якія працавалі побач. Адзін чалавек загінуў.
Сёння ўпершыню для ўдару па Харкаве Расія магла выкарыстаць «шахед» з рэактыўным рухавіком, паведаміў кіраўнік аблпракуратуры Аміл Амараў. Паводле яго слоў, дзяцей своечасова перавялі ва ўкрыццё.
Па словах гарадскога кіраўніка Ігара Церахава, у дзіцячы садок было прамое траплянне. У гэты час ва ўстанове знаходзіліся 48 дзяцей і выхавальнікаў. Пашкоджанні атрымалі шэсць жылых дамоў побач. Загінулы — работнік камунальнай установы, ён знаходзіўся каля будынка: камунальнікі вывозілі смецце і апалае лісце.
На атаку на дзіцячы садок адрэагаваў і Уладзімір Зяленскі.
«Удар расійскага беспілотніка па дзіцячым садку ў Харкаве — пасля ночы масіраванай атакі. На жаль, вядома пра аднаго загінулага. Мае спачуванні родным. Па стане на цяпер сем чалавек пацярпелі. Ім аказваецца медыцынская дапамога. Усе дзеці эвакуяваны і знаходзяцца ва ўкрыццях. Паводле папярэдняй інфармацыі, у многіх вострая рэакцыя на стрэс», — напісаў Зяленскі.
Няма і не можа быць ніякага апраўдання ўдару дронам па дзіцячым садку. Відавочна, што Расія становіцца больш нахабнай. Гэтыя ўдары — гэта плявок Расіі ў твар кожнаму, хто настойвае на мірным вырашэнні.
Каментары