У Германіі падарвалі вежы найстарэйшай атамнай электрастанцыі краіны

Аперацыя па падрыве пачалася а 12:00 па мясцовым часе, піша выданне Bild.

Дзве бетонныя вежы вышынёй па 160 метраў акуратна аселі на сваіх месцах з невялікім прамежкам у часе.

Для гэтага было прабурана больш за тысячу адтулін пад выбухоўку. Тэхнічныя падрабязнасці падрыву інжынеры абяцаюць раскрыць толькі пасля завяршэння аперацыі.

Падрыў градзірняў стаў самым бачнымі этапам зносу станцыі, якая канчаткова спыніла працу ў канцы 2021 года ў межах нямецкай праграмы па адмове ад атамнай энергетыкі.

За апошнія гады з тэрыторыі аб’екта ўжо вывезлі каля 4700 тон будаўнічых матэрыялаў, а цяпер плануюць знішчыць яшчэ 56 тысяч тон жалезабетону, які пасля будзе перапрацаваны ў друз і іншыя віды сыравіны.

Сімвал нямецкай атамнай энергетыкі

Атамная электрастанцыя Гундрэмінген, размешчаная ў акрузе Гюнцбург у Баварыі, была адной з ключавых для развіцця ядзернай энергетыкі ФРГ. Менавіта тут у 1966 годзе быў запушчаны першы буйны рэактар краіны.

Усяго станцыя мела тры блокі: А, B і C. Блок А працаваў з 1966 па 1977 год і стаў першай буйной атамнай устаноўкай Германіі. Пасля сур’ёзнага інцыдэнту ў 1977 годзе яго больш не запускалі, і ў 1983 годзе было прынята рашэнне пра поўны дэмантаж. Гэта дало каштоўны досвед у сферы разбору і ўтылізацыі радыеактыўных матэрыялаў.

Блокі B і C, пабудаваныя ў 1980‑х гадах, былі ідэнтычныя па канструкцыі і магутнасці — каля 1280 мегават кожны. Яны забяспечвалі да 30% усёй электраэнергіі Баварыі. Блок B быў спынены ў 2017 годзе, а блок C — у канцы 2021-га, стаўшы апошнім кіпячым вода-вадзяным рэактарам, што дзейнічаў у Германіі.

Закрыццё і дэмантаж

На тэрыторыі станцыі ў 2006 годзе адкрылася спецыяльнае сховішча для адпрацаванага ядзернага паліва. У ім могуць захоўвацца да 192 кантэйнераў, умацаваных бетонам таўшчынёй да 85 см. Хоць праціўнікі будаўніцтва выказвалі страх, што гэта сховішча можа стаць пастаянным, суд адхіліў іх скаргі.

Сёння падрыў градзірняў стаў сімвалічным фіналам гісторыі Гундрэмінгена — аб’екта, які больш за паўстагоддзя сімвалізаваў атамную эпоху Германіі. Пасля завяршэння разбурэння і перапрацоўкі матэрыялаў тэрыторыя будзе цалкам ачышчана і перададзена пад іншыя мэты.

Прычыны і наступствы

Германія адмовілася ад атамнай энергетыкі з-за спалучэння грамадскага страху пасля Чарнобыля і Фукусімы, палітычнага ціску з боку экалагічных рухаў і стратэгіі «Energiewende» — пераходу да аднаўляльных крыніц.

Пад уплывам партыі «Зялёныя» і шырокіх пратэстаў урад прыняў рашэнне спыніць працу ўсіх АЭС, лічачы іх небяспечнымі і маральна састарэлымі.

Хоць сёння многія эксперты адзначаюць, што гэта прывяло да павелічэння залежнасці ад вугалю і газу, а атамная энергетыка цяпер лічыцца адной з самых чыстых, большасць немцаў усё яшчэ падтрымлівае рашэнне і не бачыць вяртання да ядзернай энергетыкі.

• 3
• 0
• 0
• 5
• 3
• 0
• 0
• 0