«Дзе былі органы апекі?» Хатнім тыранам, які забіў сваю жонку ў Мазыры, аказаўся аператар НПЗ
Вінаватым у гучнай трагедыі ў Мазыры, дзе мужчына жорстка зарэзаў сваю жонку на вачах дачкі, аказаўся старшы аператар устаноўкі на Мазырскім НПЗ Павел Мішота. 41‑гадовы мужчына шмат гадоў працаваў на нафтаперапрацоўчым заводзе, яго згадвала галіновая прэса, высветліў «Флагшток».
7 лістапада, у выходны дзень, прысвечаны Кастрычніцкаму перавароту, мужчына быў п'яны і з нажом напаў на сваю жонку.
Міліцыю выклікала старэйшая дачка, а ўсяго ў мужа і жонкі было чацвёра дзяцей.
Адзін з міліцыянераў залез у кватэру праз акно і ўбачыў скрываўленую жанчыну, а побач з ёй — мужчыну з нажом.
Патрабаванне кінуць нож ён праігнараваў, давялося страляць.
33‑гадовая Ксенія атрымала як мінімум сем удараў нажом, у бальніцу яна патрапіла ў вельмі цяжкім стане і неўзабаве памерла.
Як адзначылі суразмоўцы «Флагштока», на заводзе шакаваныя тым, што адбылося, і называлі Паўла «прыстойным» чалавекам. Праўда, некаторыя адзначалі, што яго «прыстойнасць» заканчвалася пасля таго, як ён выпіваў спіртное.
У сацсетках знаёмыя мазыраніна таксама адгукаліся пра яго станоўча: быў адэкватным, клапаціўся пра дзяцей, купляў прадукты. Але іншыя знаёмыя сем'і адзначылі, што праблема хатняга гвалту існавала даўно: Павел ужо не раз збіваў жонку, адбываў адміністрацыйны арышт.
«Ёй год таму супрацоўнікі «хуткай» казалі, што трэба сыходзіць разам з дзецьмі. Вось як у ваду глядзелі, яны так ёй і сказалі, што ён цябе заб'е. Вось і вынік», — напісаў адзін з карыстальнікаў.
Шмат хто ў каментарах абурыўся тым, «дзе былі органы апекі», чаму не заўважалі і не кантралявалі праблемную сям'ю, у якой, у выніку, адбылася страшная трагедыя.
На міліцэйскім відэа затрымання хатняга тырана бачная абстаноўка ў кватэры: абшарпаныя сцены, неўпарадкаванасць.
Старонкі мужа і жонкі ў сацсетках даўно закінутыя, але Павел яшчэ некалькі гадоў таму пісаў агрэсіўныя пасты на адрас жанчын, а таксама садысцкія паведамленні.
«Вось топіш чалавека, і быццам сумна так, але потым з'яўляюцца бурбалкі, такія добрыя, і сэрца радуецца», — пісаў ён яшчэ ў 2012 годзе.
«Што за схільнасці ў табе выяўляюцца, Паш? Здаецца, быў добры і добры, а цяпер…» — здзіўляліся ў каментарах.
Цяпер чытаюць
Беларускія рэпетытары ў паніцы: праз праблемы «Яндэкса» яны могуць страціць матэрыялы, якія напрацоўвалі гадамі33
Каментары
[Зрэдагавана]
Да чаго гарэлка людзей даводзіць, шкада і яе, і дзяцей.