Сталіца Інданезіі Джакарта стала горадам з самым вялікім насельніцтвам у свеце, забраўшы лідарства ў Токіа. Паводле справаздачы Аддзела па народанасельніцтве Дэпартамента ААН па эканамічных і сацыяльных пытаннях, у Джакарце цяпер жыве каля 42 мільёнаў чалавек.
На другім месцы па колькасці жыхароў знаходзіцца сталіца Бангладэш — Дака, дзе жывуць прыкладна 36,5 мільёнаў чалавек. Ранейшы лідар, японскі Токіа, апусціўся на трэцяе месца з 33,4 мільёна жыхароў; у папярэднім дакладзе ААН за 2018 год ён займаў першае месца з 37 мільёнамі.
Іншыя месцы ў топ-10 займаюць гэтыя гарады:
4. Нью-Дэлі (Індыя) — 30,2 мільёна чалавек;
5. Шанхай (Кітай) — 29,5 мільёнаў чалавек;
6. Гуанчжоу (Кітай) — 27,5 мільёнаў чалавек;
7. Каір (Егіпет) — 25,5 мільёнаў чалавек;
8. Маніла (Філіпіны) — 24,7 мільёна;
9. Калькута (Індыя) — 22,5 мільёнаў чалавек;
10. Сеул (Паўднёвая Карэя) — 22,4 мільёна чалавек.
У справаздачы адзначаецца, што ў 1950 годзе каля 20% насельніцтва свету жыло ў гарадах, а сёння гэты паказчык вырас да прыблізна 50%. Да 2050 года дзве траціны глабальнага прыросту насельніцтва прыпадуць на гарады, астатняя траціна — на пасёлкі гарадскога тыпу.
Колькасць мегаполісаў з насельніцтвам больш за 10 мільёнаў чалавек за паўстагоддзя павялічылася ў чатыры разы — з 8 у 1975 годзе да 33 у 2025 годзе. Дзевяць з дзесяці цяперашніх найбольш заселеных гарадоў — Джакарта, Дака, Токіа, Нью-Дэлі, Шанхай, Гуанчжоу, Каір, Маніла, Калькута і Сеул — знаходзяцца ў Азіі.
Як адзначаецца ў дакладзе, урбанізацыя з’яўляецца ключавой сілай нашага часу. Пры стратэгічным і комплексным кіраванні яна можа адкрыць новыя магчымасці для барацьбы з кліматычнымі зменамі, для эканамічнага росту і сацыяльнай справядлівасці.
Трэба адзначыць, што цяпер у Інданезіі распачаўся працэс пераносу сталіцы з Джакарты ў новапабудаваны горад Нусантара. Пра перанос сталіцы з Джакарты на востраве Ява было абвешчана ў 2019 годзе. Асноўнай прычынай называлася тое, што Джакарта перанаселеная і знаходзіцца пад пагрозай апускання ў мора, а большая частка горада ўжо знаходзіцца ніжэй за ўзровень мора.
Цяпер чытаюць
«Фемінізм у маім выпадку перамог». Вераніка Станкевіч — пра дапамогу палітвязням у «Вольных» і планы на вяселле з Івуліным13
Каментары