QR-код у аўтобусе не працаваў, а кандуктарка выгнала пасажыраў, якія не мелі наяўных. Ці мае яна рацыю?
Інцыдэнт адбыўся ў адным з гарадскіх аўтобусаў Слуцка. Пасажыры сутыкнуліся з праблемай пры аплаце праезду праз QR-код, прытым транзакцыя не праходзіла ні ў каго. Кандуктарка паведаміла, што ў гэты дзень аплата такім спосабам не працуе, і папрасіла пасажыраў заплаціць наяўнымі. Тых, у каго грошай з сабой не было, паводле відавочцаў, яна ў грубай форме запатрабавала пакінуць аўтобус, паведаміла «Мінская праўда».
Пазней стала вядома, што ў той жа дзень падобныя праблемы з безнаяўнай аплатай назіраліся і ў Мінску.
У аўтобусным парку № 2 Слуцка патлумачылі, што QR-коды звязаныя з плацежнымі сістэмамі, у адной з якіх перыядычна адбываюцца тэхнічныя збоі і праводзяцца сэрвісныя работы. Перавозчык сцвярджае, што ён не можа ўплываць на працу банкаўскай сістэмы.
У той жа час прадстаўнікі аўтапарка адзначылі, што пасажыр у любым выпадку абавязаны аплаціць праезд. Калі QR-код не працуе, трэба скарыстацца іншым спосабам аплаты, напрыклад наяўнымі. Таму пасажырам параілі мець пры сабе грошы.
У аўтапарку таксама параўналі сітуацыю з купляй тавару ў краме: калі банкаўская карта або плацежны тэрмінал не працуюць, тавар без аплаты купцу не дадуць. Перавозчык заявіў, што праезд з'яўляецца такой жа паслугай, за якую неабходна заплаціць.
Асобна прадстаўнік аўтапарка патлумачыў дзеянні кандуктаркі. Паводле яго слоў, калі кантралёры зафіксуюць безбілетнага пасажыра, адказнасць могуць ускласці ў тым ліку і на кандуктарку, а штраф для яе можа быць значным. Таму ў аўтапарку лічаць, што яе дзеянні можна зразумець.
Паводле пастановы Савета Міністраў Беларусі ад 31 сакавіка 2026 года № 147, пасажыр абавязаны своечасова набыць праязны дакумент і цалкам аплаціць праезд. Аплата можа рабіцца ў кіроўцы, у касе або іншых вызначаных месцах да пачатку паездкі, а пры наяўнасці кандуктара — у яго да наступнага прыпыначнага пункта маршруту.
Такім чынам, абавязак аплаціць праезд застаецца за пасажырам нават у выпадку тэхнічнага збою банкаўскай сістэмы.
Цяпер чытаюць
Хто такая Алеся Пархоменка з Кіпра, якая развязала беларуска-беларускую вайну86
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары