Топ сучасных элітных жыллёвых комплексаў Мінска. Квадрат там каштуе да 11 000 даляраў
Паглядзелі, па чым прадаюць кватэры ў стыльных элітных комплексах, пабудаваных за апошнія гады.
Дэпо
Квартал «Дэпо» каля плошчы Перамогі лічыцца самым дарагім. Некаторыя эксперты называюць яго адзіным сапраўды элітным ЖК у Мінску.
На гэты момант у працэсе будаўніцтва знаходзяцца чатыры дамы. Два з іх мусяць здаць сёлета, і толькі ў адным з іх у продажы засталіся дзве кватэры. Яшчэ шэсць ёсць у доме, які здаюць налета, і пяць кватэр — у доме, які дабудуюць толькі ў 2028 годзе.
Цэны на гэтыя восем кватэр невядомыя.
Але ў продажы хапае кватэр, якія прадаюцца ў суседніх дамах. Самая танная прапанова — двухпакаёўка з голымі сценамі агульнай плошчай 50,6 м². Просяць за яе 275 тысяч даляраў, або па $5435 за квадрат.
Адметна, што ў 2023 годзе на этапе будаўніцтва двухпакаёўкі ў «Дэпо» плошчай 50,5 м² можна было набыць за 160 тысяч даляраў ($3170/м²).
У продажы ёсць яшчэ двухпакаўёка на 57 квадратаў за 385 тысяч даляраў, таксама без рамонту. Квадрат тут агулам выходзіць па 6150 даляраў, але трэба ўлічваць, што ў кошт уваходзяць кладоўка і машына-месца ў падземным паркінгу.
Голую трохпакаёўку плошчай 94 м² прадаюць за 485 тысяч даляраў, ці па 5170 даляраў за квадрат. Без парковачнага месца.
А за самую дарагую кватэру ў элітным квартале просяць амаль мільён даляраў. Праўда, гэта ўжо кватэра, цалкам гатовая для пражывання, з рамонтам, мэбляй і тэхнікай. Трохпакаёўку з агульнай плошчай 89 метраў выставілі за 980 тысяч даляраў. Гэта, на хвіліначку, па $11 тысяч за метр!
Андрэеўскі
ЖК «Андрэеўскі» — яшчэ адзін комплекс у цэнтральнай частцы Мінска, выкананы ў скандынаўскім стылі.
У двух дамах, якія цяпер будуюцца, будзе 100 кватэр.
Квадрат у гэтым ЖК каштуе ад 2250 да 2800 даляраў.
Таму ў параўнанні з «Дэпо» цэны на кватэры тут, можна сказаць, бюджэтныя.
Маэстра
Жыллёвы комплекс месціцца на вуліцы Няміга, 46. У крокавай дасяжнасці знаходзіцца станцыя метро «Плошча Францішка Багушэвіча».
Гэты 20‑павярховы ЖК заняў першае месца на фестывалі Беларускага саюза архітэктараў у намінацыі «Жылыя шматпавярховыя дамы».
На сайце забудоўшчыка пазначана, што квадрат каштуе ад 2000 даляраў і там ёсць як мінімум дзевяць нераспрададзеных кватэр ад забудоўшчыка плошчай ад 50 да 250 квадратаў.
Яшчэ дзве кватэры без рамонту ёсць у продажы ад уласнікаў. За голыя сцены і 76 квадратаў на 16 паверсе просяць 275 тысяч даляраў (па $3600/м²).
А за кватэру на 53 метры на шостым паверсе — 253 тысячы ($4800/м²).
Паўночны бераг
Гэты жыллёвы комплекс праславіўся тым, што цэны на кватэры ў ім агучвалі толькі пасля ўнясення зваротнага дэпазіту памерам 7000 рублёў.
Забудоўшчык называе ЖК «Паўночны бераг» прынцыпова новым поглядам на жылы комплекс — ён размешчаны на беразе ракі і акружаны прыродай.
Праўда, сапраўды каштоўныя там не ўсе кватэры, а толькі тыя, што месцяцца на паркава-прыбярэжнай лініі.
Так, напрыканцы 2025 года самая танная кватэра, прададзеная ў доме на вуліцы Віталя Цвіркі, 88, мае плошчу 62,3 квадратнага метра. Яе купілі амаль за 319 тысяч даляраў — гэта па 5118 даляраў за квадратны метр (па тагачасным курсе).
Кватэра плошчай 79 квадратных метраў стала самай дарагой — 450 тысяч даляраў, што складала 5692 даляры за квадратны метр.
Нізкапавярховая «Левада»
Блізкімі да элітных лічацца кватэры ў 4‑ 5‑павярховых дамах у квартале «Левада».
Самая даступная кватэра ў чатырохпавярховым доме на Новавіленскай мае агульную плошчу 80 метраў і прадаецца за 235 тысяч даляраў ($2940/м²).
Самая дарагая кватэра ў квартале знаходзіцца ў суседнім доме. За чатырохпакаёўку плошчай 103 метры, з голымі сценамі і трохметровымі столямі просяць 345 тысяч даляраў ($3340/м²). У цану ўваходзіць парковачнае месца.
Хто купляе?
Летась Realt.by, спасылаючыся на даныя швейцарскага банка UBS у даследаванні Global Wealth Report 2023 года, пісаў, што ў Беларусі жыве каля 7300 даляравых мільянераў.
Па іншых ацэнках называлася лічба ў 10—12 тысяч мільянераў.
Больш за 80 працэнтаў пакупнікоў элітнага жылля — гэта беларусы. Яшчэ каля 10% — этнічныя беларусы, якія зарабілі за мяжой, і каля 10% — замежнікі.
Цяпер чытаюць
Беларусы сустракаюць вызваленых палітвязняў у Вільні ФОТЫ і ВІДЭА2
Каментары