Оба-на, інтэграцыя!
Падчас сустрэчы з Лукашэнкам вядомы гумарыст Ігар Угольнікаў папрасіў АГЛ надаць свайму праекту «Фіціль» статус агульнасаюзнай праграмы. Даўно трэба пашыраць інтэграцыю на гумарыстычна-забаўляльны блёк!
Падчас сустрэчы з Лукашэнкам вядомы гумарыст Ігар Угольнікаў папрасіў АГЛ надаць свайму праекту «Фіціль» статус агульнасаюзнай праграмы. Даўно трэба пашыраць інтэграцыю на гумарыстычна-забаўляльны блёк!
«Фіціль», у сюжэтах якога будуць уздымацца актуальныя тэмы беларуска-расейскай інтэграцыі, сапраўды будзе супэрпрышпільны. Дастаткова прадэманстраваць гэта на нейкіх ягоных старых сюжэтах, напрыклад, на роліку «Дзіцячы садок».
Сцэнар сюжэту роліку «Дзіцячы садок», падкарэктаваны з улікам таго, што праграма «Фіціль» стала агульнасаюзнай:
Музыка-застаўка праграмы.
Тытры: «Дзіцячы садок».
У кадры рэпартэр, побач супрацоўніца садочку. На заднім пляне гуляюць дзеці.
Рэпартэр: Маргарыта Сьцяпанаўна, распавядзеце нам аб дзетках, якія ў вас ёсьць?
Супрацоўніца: Ну, што можна сказаць? Дзеці падобныя да сваіх бацькоў, і гэта ісьціна відавочная. Глядзеце толькі, у што яны гуляюць. Вось, напрыклад, Гальляш. Ягоны татка працуе бізнэсоўцам.
У кадры маленькі хлопчык на цацачным аўтамабілі, які размаўляе па цацачнай мабілцы.
Супрацоўніца: А цяпер да яго ідзе Алежык. Ягоны тата – кіраўнік гарадзкога аддзелу ДАІ.
У кадры да хлопчыка Гальляша падыходзіць Алег і патрабуе ад таго дакумэнты.
Супрацоўніца: А Пецеў бацька – вялікая шышка ў «Газпроме».
У кадры хлопчык у пясочніцы, рые, нібыта здабывае газ.
Супрацоўніца: А там у нас Таня. Яна дачка звычайнай беларускай даяркі, якая зарабляе 600 баксаў. Ім у сям’і зусім няма куды дзяваць грошы.
У кадры сядзіць Таня і тупа раскідвае фанцікі ад цукерак, якія сымбалізуюць даляры.
Рэпартэр: Я гляджу, у вас у садку ёсьць нават дзеці іншаземцаў.
Супрацоўніца: Так, гэта Олаф, сын аднаго дацкага бізнэсоўца.
У кадры хлопчык Олаф, ён ходзіць вакол клюмбы і кажа: «О-о-о! Мы ехалі сюды з асьцярогаю, можа быць, нават з жахам – дыктатура, сярэднявечча, крымінал... А цяпер мы вельмі па-добраму зьдзіўленыя і жадаем будаваць каля гэтай клюмбы вялікі сьвінячы комплекс. Хто хоча інвэстыцыяў?»
Рэпартэр: Мне казалі, што ў вас ёсьць сын аднаго крамлёўскага бонзы?
Супрацоўніца: Генік, ну, канечне. Вось ён.
У кадры хлопчык Генік, які праглядае нейкія паперкі, потым ірве іх, адначасова кажучы: «Не, не. Мы надаем саюзнай дзяржаве занадта шмат паўнамоцтваў. Саюзную дамову трэба адкласьці. Нашая эліта не гатовая на такі шчыльны саюз».
Рэпартэр: А ў тэй дзяўчынкі зь лялькамі, відаць, бацькі – пэдагогі?
Выхавацелька: Што вы. Ейныя бацькі – чачэнцы, якія зьбеглі з Расеі ў Беларусь і на знак падзякі лідэру краіны называюць сваіх дзяцей яго імем.
У кадры дзяўчынка зь некалькімі цацкамі. Гуляе, гаворачы: «Саша хоча есьці. А гэты Саша хоча гуляць. А гэты Саша – спаць. Баю-бай. А ты, Саша, відаць, захварэў. Саплівы ты мой, амаль як малады прэзыдэнт».
Рэпартэр: А хто бацька ў таго, вось у таго хлопчыка?
Выхавацелька: Я сама пакуль не зразумела, дзе працуюць бацькі Андрэя.
У кадры маленькі хлопчык бегае з трубой і енчыць: «Я ні магу аддаць трубы за батончык «Сьнікерсу» і дзьве налепкі. Толька пусьці казла ў гарод! 500 «Сьнікерсаў» – вось кошт гэтай трубы!»
Смех за кадрам.
Раптам да яго падбягае Пеця і Генік і пачынаюць вырываць трубу.
Смех за кадрам.
Музыка-застаўка праграмы.
Тытры: «Фіціль – агульнасаюзная праграма».
Дырэктар Ігар Угольнікаў.
Каментары