ААН прыняла рэзалюцыі пра парушэньне правоў чалавека — аднолькавыя для Беларусі й Ірану
Трэці камітэт Генасамблеі ААН прыняў рэзалюцыю «Становішча ў галіне правоў чалавека ў Беларусі». Практычна аналягічная рэзалюцыя была прынятая ў дачыненьні да Ірану.
Трэці камітэт Генасамблеі ААН прыняў рэзалюцыю «Становішча ў галіне правоў чалавека ў Беларусі». Практычна аналягічная рэзалюцыя была прынятая ў дачыненьні да Ірану.
Рэзалюцыю ў дачыненьні да Беларусі ініцыявалі ЗША і краіны Эўразьвязу. За яе прыняцьцё выступілі 70 краінаў, супраць – 31. Прадстаўнікі 67 дэлегацый устрымаліся ў ходзе галасаваньня.
У абарону Беларусі выступілі Расея, Куба, Кітай, Іран, Сырыя, Вэнэсуэла, Узбекістан і Судан. Яны назвалі рэзалюцыю палітычна матываванай і падкрэсьлілі, што яна не спрыяе разьвіцьцю супрацоўніцтва і дыялёгу ў сфэры праваабарончай дзейнасьці ААН.
Расея, Куба і Кітай паспрабавалі скарыстацца працэдурнымі правіламі, каб не выносіць на галасаваньне рэзалюцыю па Беларусі, аднак прапанова гэтых краінаў не прайшла.
Прадстаўніца Фінляндыі ў выступе ад імя ЭЗ заявіла, што парушэньне правоў чалавека ў Беларусі ёсьць інструмэнтам дасягненьня палітычных мэтаў і заклікала ўсе краіны падтрымаць гэтую рэзалюцыю.
У рэзалюцыі «Становішча ў галіне правоў чалавека ў Беларусі» гаворыцца, што ў краіне ўсё часьцей выкарыстоўваецца практыка рэпрэсій ў дачыненьні да прадстаўнікоў апазыцыі, вядзецца крымінальны перасьлед праваабаронцаў, журналістаў і тых, хто выступае ад імя няўрадавых арганізацый.
Як адзначаецца ў тэксьце рэзалюцыі, беларускія ўлады працягваюць парушаць узятыя «міжнародныя абавязацельствы што да правядзеньня свабодных і справядлівых выбараў». У сувязі з гэтым краіны, якія падтрымалі рэзалюцыю, заклікаюць афіцыйны Менск «прывесьці Выбарчы кодэкс і заканадаўчую базу ў адпаведнасьць зь міжнароднымі стандартамі», – паведамляе навінавая служба ААН.
Фота un.org
Каментары