Пан Гі Мун заклікаў абмеркаваць на Радзе Бяспекі ААН пастаўкі зброі з Беларусі 23
Прадстаўнікі ААН у Кот-д’Івуары не здолелі праверыць верталёты, былі вымушаныя адступіць пад абстрэлам з боку аховы.
Генеральны сакратар ААН Пан Гі Мун 28 лютага заклікаў тэрмінова склікаць пасяджэнне Рады бясьпекі ААН для абмеркавання пытання аб незаконных пастаўках зброі з Беларусі ў афрыканскую краіну Кот-д’Івуар у абыход эмбарга ААН.
Паводле звестак ААН, напярэдадні ў сталіцу Кот-д’Івуара Ямусукро з Беларусі былі дастаўленыя тры баявыя верталёты з рыштункам. Аднак Рада бяспекі ААН не сабралася, бо міратворцам ААН у Кот-д’Івуары не ўдалося пацвердзіць прыбыцця верталётаў.
Афіцыйныя прадстаўнікі ААН у Кот-д’Івуары 28 лютага спрабавалі праверыць, ці знаходзяцца на лётнішчы Ямусукро пастаўленыя з Беларусі тры верталёты, але былі вымушаныя адступіць пад абстрэлам з боку аховы.
Пан Гі Мун даў загад міратворцам ААН у Кот-д’Івуары «ўжыць усе неабходныя дзеянні», каб не дапусціць выкарыстання верталётаў, піша газета The Wall Street Journal. У бюро генеральнага сакратара ААН падазраюць, што тры верталёты тыпу Мі-24 з Беларусі прызначаюцца сілам Ларана Гбагбо, які прайграў прэзыдэнцкія выбары ў лістападзе летась, але адмовіўся сысці з пасады.
ААН непакоіцца, што беларускія верталёты, узброеныя кулямётамі і ракетамі, могуць абвастрыць канфлікт у краіне, якая знаходзіцца на мяжы новай грамадзянскай вайны.
Прэс-сакратар МЗС Беларусі Андрэй Савіных 28 лютага абверг паведамленні, што Беларусь магла выслаць верталёты ў Кот-д’Івуар у абыход эмбарга ААН.
