Вытворчасць французскага шампанскага ў 2026 годзе можа скараціцца амаль удвая ў параўнанні з мінулым годам. Прычынай сталі экстрэмальныя ўмовы надвор’я, якія істотна паўплывалі на ўраджай вінаграду, паведамляе агенцтва Bloomberg.
Паводле інфармацыі французскага Міністэрства сельскай гаспадаркі, сёлета ў краіне плануюць вырабіць каля 1,34 мільёна гекталітраў шампанскага — на 48% менш, чым у 2025 годзе.
Скароціцца і агульная вытворчасць віна. Чакаецца, што ў 2026 годзе яна складзе каля 34 мільёнаў гекталітраў, што на 6% менш за леташні паказчык і на 17% ніжэй за сярэдні ўзровень апошніх пяці гадоў. Гэта можа стаць найгоршым вынікам французскай вінаробнай галіны з 1957 года.
Галоўнай прычынай стала анамальная спякота, якая гэтым летам ахапіла Еўропу. З-за высокіх тэмператур збор вінаграду ў многіх рэгіёнах пачалі значна раней. Сёлетні ўраджай у Францыі можа аказацца адным з самых слабых за апошнія тры дзесяцігоддзі.
Асабліва моцна пацярпеў сорт Піно Нуар у Бургундыі — страты ўраджаю перавысілі 50%. У Шампані збор таксама пачалі незвычайна рана, каб ягады не паспелі пераспець і назапасіць занадта шмат цукру, што магло б прывесці да павышэння ўтрымання алкаголю ў віне. Чакаецца, што вага гронак тут будзе найменшай за апошнія 20 гадоў.
У рэгіёне Бардо сітуацыя лепшая: вытворчасць можа павялічыцца на 10% у параўнанні з вельмі нізкім паказчыкам 2025 года. Аднак нават пасля гэтага яна будзе прыкладна на 11% ніжэйшай за сярэдні ўзровень 2021—2025 гадоў.
Пры гэтым надвор’е — не адзіная праблема французскіх вінаробаў. Галіна таксама сутыкаецца са зніжэннем попыту на алкаголь, зменамі ў спажывецкіх звычках і складанай эканамічнай сітуацыяй.
На мінулым тыдні французскі ўрад выдзеліў больш за 1 мільярд еўра на дапамогу фермерам, якія пацярпелі ад летняй спёкі і лясных пажараў.
Цяпер чытаюць
«Я яб*н, таму і пайшоў». Малады беларус кінуў цяжарную жонку і паехаў на вайну, пасля здрадзіў ёй дый загінуў16
Каментары