Някляеў пад хатнім арыштам напісаў новы верш. А Зміцер Вайцюшкевіч паклаў яго на музыку.
Някляеў пад хатнім арыштам напісаў новы верш. А спявак Зміцер Вайцюшкевіч паклаў яго на музыку. Кампазіцыя называецца «Красуня-вясна».
«Гэты верш Уладзімір Пракопавіч напісаў пра вясну і прысвяціў дзвюм Волям: свабодзе і жонцы Вользе, — сказаў Зміцер Вайцюшкевіч парталу tut.by. — Ад сябе дадам: ніхто не забыты, нішто не забыта».
Упершыню песню «Красуня-вясна» слухачы пачулі на мінскім канцэрце спевака 8 сакавіка.
Нагадаем, што Уладзімір Някляеў абвінавачваецца ў арганізацыі беспарадкаў у Мінску 19 снежня. Цяпер ён знаходзіцца пад хатнім арыштам. Кантактаваць з людзьмі, акрамя жонкі і следчых, ён не можа.
Напрадвесні плачуць ледзяшы,
Ручаіны звоняць напрадвесні.
Ты мне ціха-ціха для душы
Заспявай прадвесневую песню.
Хай душа ўскалышацца да дна
І туды пакліча, дзе святая,
Дзе на ўзлеску юная вясна
Першыя пралескі рассыпае.
Красуня-вясна звініць ручаінамі ў полі (ты нас не пакінеш ніколі),
Красуня-вясна – сястра нашай волі,
Красуня-вясна ў бела-чырвоным убранні (шчаслівая ў першым каханні),
Красуня-вясна – чароўная фея кахання.
Ад вясны нікуды не ўцячы,
І праз вецер, што сцягі палошча,
Пойдзем мы з табой, каб уначы
Запаліць агеньчыкі на плошчы.
Будзем мы стаяць і ўспамінаць
Тых, каго няма сягоння з намі,
Тых, каго мы будзем сустракаць
З бел-чырвона-белымі сцягамі.
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку16
Каментары