Інстытут ваенных даследаванняў: Справа ідзе да доўгай і крывавай вайны
Нямецкі часопіс Der Spiegel апублікаваў вынікі новай справаздачы амерыканскага аналітычнага цэнтра Institute for the Study of War. Гэты цэнтр вельмі інтэнсіўна сочыць за сітуацыяй ва Украіне, і ягоны прагноз не радуе: справа ідзе да доўгай і крывавай вайны. Ключавыя высновы справаздачы ў пераказе Аляксандра Фрыдмана.
1. Расійскія войскі не прасоўваюцца. Усё больш верагодным уяўляецца «крывавы пат», а вайна будзе працягвацца тыдні ці нават месяцы.
2. У выпадку «крывавага пата» наступіць сітуацыя, пры якой баявыя дзеянні будуць працягвацца, але становішча на фронце кардынальна мяняцца не будзе. Гэта тая самая сітуацыя, якая мела месца ў Першай сусветнай вайне на Заходнім фронце.
3. Расіяне паспрабуюць усталяваць палітычны кантроль над занятымі тэрыторыямі, а ва Украіну будуць адпраўленыя дадатковыя рэзервы.
4. Бамбардзіроўкі ўкраінскіх гарадоў з мэтай зламаць супраціў насельніцтва працягнуцца, але гэтая стратэгія не прынясе расіянам поспеху.
5. У Маскве змірыліся з думкай, што заняць Кіеў не атрымаецца, але будуць працягваць артылерыйскія ўдары па цэнтральнай частцы сталіцы.
6. Калі расійскім войскам яшчэ і ўдасца заняць які-небудзь буйны ўкраінскі горад, то гэта будзе Марыупаль (дакладней, тое, што ад яго засталося). Магчымыя прарывы ў кірунку Крывога Рога, Дняпра ці Запарожжа пацерпяць паразу.
7. Працягнуцца спробы захапіць Харкаў.
8. Буйнога наступлення па ўсім фронце не чакаецца. Хутчэй за ўсё, прыбудзе малое падмацаванне і з яго дапамогай расійскія войскі будуць спрабаваць наступаць па вядомых ужо напрамках.
Аб уступленні беларускай арміі ў вайну ў справаздачы нічога не гаворыцца. Але аналіз стану спраў робіць яго вельмі верагодным: Расія востра мае патрэбу ў новых сілах.
Як склаўся лёс хлопца з вядомага жыццесцвярджальнага фота студэнцкага маршу-2020?3
Каментары