U čas znachodžańnia ŭ Ńju-Jorku pa zaprašeńni prezidenta ZŠA Baraka Abamy premjer-ministr Biełarusi Michaił Miaśnikovič sumiesna z časovym pavieranym u spravach Biełarusi ŭ ZŠA naviedaŭ pryjom dla kiraŭnikoŭ delehacyj, jakija prybyli na siesiju Hienieralnaj Asamblei AAN.
U chodzie karotkaj pratakolnaj hutarki z prezidentam ZŠA Michaił Miaśnikovič pieradaŭ kiraŭniku amierykanskaj dziaržavy najlepšyja pažadańni ad Alaksandra Łukašenki.
Padčas pryjomu kiraŭnik biełaruskaha ŭrada pravioŭ hutarki z prezidentami Sierbii, Charvatyi, Łatvii, Finlandyi, ministrami zamiežnych spraŭ Litvy, Kazachstana i Bachrejna. U pryvatnaści, prezident Sierbii vykazaŭ zacikaŭlenaść u raźvićci siabroŭskich kantaktaŭ z kiraŭnictvam Biełarusi i ŭ praciahu realizacyi sumiesnych uzajemavyhadnych prajektaŭ.
Adbyłasia hutarka Michaiła Miaśnikoviča z Ronam Džonsanam, sienataram ZŠA ad štata Viskonsin, staršym pa ranhu členam padkamitetu pa jeŭrapiejskich pytańniach Savieta ad Respublikanskaj partyi. Džonsan vykazaŭ biełaruskamu boku ŭdziačnaść za pryncypovuju pazicyju kiraŭnictva krainy pa Ukrainie i vykazaŭ nadzieju na toje, što Biełaruś i nadalej budzie adyhryvać značnuju rolu va ŭrehulavańni kanfliktu.
Prezident ZŠA ŭ vystupie pierad udzielnikami pryjomu spyniŭsia na klučavych vyklikach, ź jakimi siońnia sutykajecca suśvietnaja supolnaść. Druhim u liku takich vyklikaŭ nazvany kryzis va Ukrainie. Spasyłajučysia na dziejnaść bajevikoŭ tak zvanaj Isłamskaj dziaržavy Iraka i Levanta, Barak Abama padkreśliŭ niedapuščalnaść vykarystańnia relihii ŭ jakaści prykryćcia dla vuzkakaryślivych metaŭ i zadač. Na dumku prezidenta ZŠA, dla vyrašeńnia hłabalnych vyklikaŭ usim krainam śvietu varta pieraadoleć roznahałośsi i abjadnać vysiłki.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ129
Kamientary