Abloty amierykanskich karabloŭ samalotami rasijskich VPS mohuć rana ci pozna pryvieści da vypadkovych sutyknieńniaŭ z adkryćciom ahniu. Pra heta paviedamiŭ staršynia Abjadnanaha kamiteta načalnikaŭ štaboŭ Džozef Danfard, jaho słovy pieradaje resurs Military.com.
Danfard vystupaŭ sa spravazdačaj pierad amierykanskimi sienatarami i raskazaŭ im, što trojčy abmiarkoŭvali incydenty z karablami VMF ZŠA z načalnikam Hienieralnaha štaba Uzbrojenych sił Rasii Valeryjem Hierasimavym. Pavodle jaho słoŭ, jany damovilisia nie abmiarkoŭvać pryčyny hetych incydentaŭ, adnak Danfard vykłaŭ punkt hledžańnia ZŠA.
Danfard zaŭvažyŭ, što abloty stvarajuć situacyju, kali kapitan pavinien pryniać lubyja nieabchodnyja miery dla abarony karabla i pry hetym nie abaviazany zapytvać dazvołu vyšejšaha kamandavańnia na toje ci inšaje dziejańnie. Na jaho dumku, heta stvaraje ryzyku «niasłušnaj acenki situacyi».
13 krasavika ŭ ŚMI źjavilisia paviedamleńni ab tym, što rasiejskija frantavyja bambaviki Su-24 i bajavy viertalot Ka-27 pralacieli nad amierykanskim eśmincam «Donald Kuk», jaki znachodziŭsia ŭ Bałtyjskim mory.
Kamientujučy toje, što adbyłosia, u Biełym domie zajavili, što incydent «supiarečyć prafiesijnym normam vajskoŭcaŭ, jakija dziejničajuć u niepasrednaj blizkaści adzin ad adnaho ŭ mižnarodnych vodach i mižnarodnaj pavietranaj prastory». Paźniej dziaržsakratar ZŠA Džon Kery ŭ telefonnaj razmovie z kiraŭnikom MZS Rasii Siarhiejem Łaŭrovym zajaviŭ jamu aficyjny pratest.
Akramia taho, 16 krasavika ŭ Jeŭrapiejskim kamandavańni ZŠA zajavili, što rasijski źniščalnik Su-27 vyjšaŭ na pierachop amierykanskaha samalota-vyviednika RC-135 u niebie nad Bałtyjskim moram. Incydent adbyŭsia ŭ čaćvier, 14 krasavika. Su-27 «vykanaŭ ahresiŭny manieŭr», pralacieŭšy na adlehłaści kala 15 mietraŭ ad RC-135. Samalot-vyviednik znachodziŭsia nad niejtralnymi vodami i nie ŭvachodziŭ u rasijskuju pavietranuju prastoru.
U rasijskim Minabarony raskazali, što dziažurnyja siły SPA nad Bałtyjskim moram vyjavili nieviadomuju pavietranuju cel, jakaja ź vialikaj chutkaściu nakiroŭvałasia da rasijskaj dziaržaŭnaj miažy. Dla identyfikacyi sa składu dziažurnych sił avijacyi Bałtyjskaha fłotu byŭ uźniaty adzin źniščalnik Su-27, jaki, ździejśniŭšy ablot celi vyznačyŭ abjekt jak samalot-vyviednik RC-135U VPS ZŠA. Paśla vizualnaha kantaktu z Su-27 samalot-vyviednik źmianiŭ kurs u procilehły bok.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ138
Kamientary