«Klerki suprać budzilnikaŭ»: supracoŭniki minskich ofisaŭ znajšli sposab pieramahčy niedasyp
U bajnecie nabiraje papularnaść sajt, na jakim supracoŭniki ofisaŭ mohuć pakinuć zajaŭku na adsypnuju — prava raz na miesiac prychodzić na pracu vyspanym i da 11:00 - i atrymać «zaachvočvańnie snom» dla siabie i kaleh. Stvaralniki sajta nazyvajuć siabie Kłubam ananimnych amataraŭ paspać i śćviardžajuć, što stać supierhierojem dla ŭsiaho ofisa moža kožny. Užo zaraz zajaŭki na adsypnuju pakinuli bolš za 30 «biełych kaŭnierykaŭ», u tym liku i supracoŭniki kampanij Vegas i Wargaming.
Letaś daśledčyki vyśvietlili, što bolšaści biełarusaŭ (bolš za 66%) nie chapaje času na adpačynak, a bolš za pałovu (55,4%) nazvali pracu hałoŭnaj pryčynaj niedasypu. Sioleta supracoŭniki staličnych ofisaŭ, papiarednie abaraniŭšy svoj letni adpačynak, abjadnalisia ŭ «Kłub ananimnych amataraŭ paspać», kab zmahacca z chraničnym zimovym niedasypam.
Aktyvisty zapuścili www.otsypnoy.by, dzie luby biełaruski mieniedžar abo ajcišnik moža pakinuć zajaŭku na adsypny — pryvilej raz na miesiac adklučać budzilnik i pryjści na pracu da 11-j hadziny. Svajo patrabavańnie adsypnoha jany mohuć dapoŭnić asabistymi skarhami na sacyjalnyja sietki i sieryjały, a taksama raskazać, na što hatovyja dziela lišniaj paŭhadziny snu.
— Ja, jak i mnohija, nie vysypajusia. Sama vinavataja, viadoma, nie mahu admović sabie ŭ pary sieryj dobraha sieryjała, a potym uklučaju jašče dźvie… i jašče… A tut chto biez hrachu? Chiba heta nahoda nie vysypacca? — ździŭlajecca Kaciaryna, supracoŭnica banka.
Pakinuć zajaŭku na adsypnuju možna ananimna, raspavioŭšy pra toje, čamu mienavita nie vysypajeciesia, abo padzialicca prablemami ŭsiaho ofisa. Dla hetaha dastatkova zapoŭnić formu na sajcie. Stvaralniki kłuba abiacajuć dapamahčy kožnamu, chto «zdaść» svaju kampaniju. Na adras ofisa pryjdzie siabroŭski list, jaki pierakanaje kiraŭnictva ŭvieści adsypnuju, a skaržnika zrobić sapraŭdnym hierojem — prychodzić na pracu raz na miesiac da kamfortnaj 11-j ranicy zmoža kožny supracoŭnik ofisa.
Užo zaraz da Kłuba ananimnych amataraŭ paspać dałučylisia bolš za 50 čałaviek, u tym liku pradstaŭniki Vegas i Wargaming. Samymi zaležnymi ad snu, niečakana, akazalisia ajcišniki. Supracoŭniki navat samych kamfortnych ofisaŭ achvotna dzielacca pryčynami niedasypu i prapanujuć abstalavać svaje kabiniety matracam.
«Usie pišuć, jak dobra być prahramistam, maŭlaŭ, prychodź u ofis, kali zručna, hałoŭnaje, pracu vykonvaj. A voś jak byvaje: u 10.00 sustreča z kiraŭnictvam i inšaja bałbatnia, potym ceły dzień kodziš, nie padymajučy hałavy. A 19.00 narešcie pračynajecca ofis u Štatach i što-niebudź łamajecca, i nam davodzicca ŭsiu noč pracavać. A ŭžo na nastupny dzień treba znoŭ na sustreču da 10:00 ranicy. Daŭno para abstalavać ofis matracam», — piša karystalnik pad nikam DmitryIT, pradstaŭnik kampanii-rezidenta PVT.
Darečy, pakinuć zajaŭki na adsypnuju mohuć ejčar i navat načalniki, jakija taksama zmahajucca sa snom pry dapamozie espresa i hučnaj muzyki. Stvaralniki kłuba abiacajuć, što kožny hołas budzie ŭličany i pačuty, a biełaruskija ofisy zusim chutka zapaŭniać ščaślivyja i vyspanyja supracoŭniki.
Kamientary