Minskaja viełatrasa za dzień da adkryćcia

Karespandent NN prajechaŭ pa minskaj viełatrasie za dzień da jaje aficyjnaha adkryćcia. Dabraŭšysia da kanca trasy, jon zrazumieŭ, što taja nikudy nie viadzie.

Čarhovy nacyjanalny prajekt za $10 młn

Vieładarožku praciahłaściu 27 kiłamietraŭ źbiralisia rabić dosyć daŭno. Biudžet – $10 młn – byŭ raźmierkavany na niekalki hod. Budaŭnictva pastajanna adkładvałasia, ale krajni termin zdačy abjekta – «Dzień horada — 2009» — prymusiŭ rabočych paśpiašacca.

U apošni dzień na pracu vyjšli sotni čałaviek, kab pracavać, i dziesiatki, kab ich padhaniać.

Ci paśpiejuć jany da zaŭtra – sumnieŭna.

Pracy jašče niamierana. Na najbolš składanych ŭčastkach – pabudavanych mastkach praź Śvisłač — jašče nie pačali kłaści asfalt.

Daroha na chakiej?

Trasa prachodzić z paŭnočnaha zachadu na paŭdniovy ŭschod biełaruskaj stalicy. Budaŭniki ŭdała skarystalisia Śvisłačču – amal usia trasa prachodzić uzdoŭž rusła raki. U hetaha rašeńnia jość jak svaje plusy, tak i svaje minusy. Z adnaho boku, pakłaści ŭzdoŭž uźbiarežža asfalt i nanieści na jaho raźmietku było nieskładana. Ź inšaha –

vieładarožka akazałasia izalavanaj ad astatnich daroh.

Viełatrasu možna ŭsprymać jak svojeasablivy ekskursijny maršrut. Kali turyst vyrašyć paznajomicca ź biełaruskaj stalicaj, prajechaŭšy na rovary tyja samyja 27 kiłamietraŭ, u jaho składziecca roznabakovaje ŭražańnie pra Minsk. Napieradzie buduć i vieličnyja ofisnyja centry, i cianistyja parki, i aharody ŭ dvuch-troch mietrach ad trasy, i spalny rajon.

Vieładarožka pačynajecca niedaloka ad prezidenckaj rezidencyi ŭ Drazdach. Kali ŭličyć, što jaje kaniec – niepadalok ad rajonu Čyžoŭka, dzie praź piać hod buduć pravodzicca hulni čempijanata śvietu pa chakiei, možna ličyć udałym žart, što viełatrasa patrebna Łukašenku, tolki kab jeździć na chakiej.

Ad Drazdoŭ da centru. Minsk zialony i Minsk sučasny

Trasa ŭjaŭlaje saboj darožku z «dvajnoj sucelnaj» u siaredzinie — pa pałasie ŭ kožny bok. Kirunki paznačanyja strełkami. Zvyčajna zboku pakładziena plitka dla minakoŭ, ale tyja zajmajuć samy centr trasy i zusim nie źviartajuć uvahu na ravarystaŭ. Zrešty, tych jašče niašmat. Za čas svajho padarožža ja sustreŭ tolki troch achvotnikaŭ dvuchkołavaha transpartu.

Uzdoŭž trasy musiać źjavicca viełastajanki i punkty prakatu rovaraŭ, ale pakul što, vidavočna, nie da ich. Paśpieć by pakłaści asfalt.

Darožka spačatku idzie pa lesie, paśla vychodzić na praśpiekt Mašerava, i narešcie, kala steły nyraje pad most. Ciapier my budziem jechać uzdoŭž raki. Kala Pałacu sportu pa viełatrasie jedzie mikraaŭtobus ź milicyjantami. Pabačyŭšy rovar, jaki ruchajecca nasustrač, milicyjanty vietliva zbočyli, kab nie zaminać mnie i nie prymušać źnizić chutkaść. Takaja ich reakcyja nie mahła nie paradavać.

Da parku imia Janki Kupały trasa prosta vydatnaja. Kab ravarystam nie było sumna jechać pa pramoj darozie, budaŭniki skryvili jaje. Trasa trochi piatlaje.

Pierasiačeńnie z vulicaj Kupały – pieršaja prablema.

Papiatlaŭšy vakoł drevaŭ u parku Kupały, vieładarožka vychodzić u park Horkaha. Tut budaŭnictva ŭ samym razhary. Treba darabić most cieraź Śvisłač i źjezdy ź jaho. Pieraadoleŭšy pieraškodu, vyjazdžaju na praciah trasy, jak ź niemym krykam nasustrač vybiahaje mužčyna ŭ kaściumie: «Kamandzir, sto-oj! Što, jašče nie vidna? Tut jašče nielha jechać!» Choć z vyhladu daroha ničym nie adroźnivajecca ad toj, dzie «možna jechać».

Ad centru da Sierabranki. Minsk industryjalny.

Dalej pieraškod na šlachu stanovicca ŭsio bolš. Najbolš prablem z novapabudavanymi mastami. Pa-pieršaje, ich aŭralna skančajuć u apošni dzień. (Choć by jany nie abvalilisia.) Śpioka, i pracavać zusim nie chočacca. Voś i atrymlivajecca, jak u toj prykazcy savieckaha času: «A ŭ kałhasie dobra žyć: dziesiać robić, sto lažyć. A jak sonca prypiače, dyk i dziesiać uciače». Dva čałavieki niešta robiać, a jašče piać chodziać vakoł z pakdazkami ci ŭvohule adpačyvajuć na hazonie. Pa-druhoje, navat kali ich adkryjuć dla ruchu, karystacca imi budzie nie nadta zručna.

Pavaročvać na chutkaści na 90 hradusaŭ ubok i adrazu ž ŭźlatać na vysoki padjom sapraŭdy ekstremalna.

Ludziej uzdoŭž trasy ŭsio mienieje, a pracaŭnikoŭ boleje… Prajechać stanovicca niemahčyma, prychodzicca šukać abjaznyja šlachi.

Tym časam jana viartajecca da stadyjona «Dynama» i studenckaha haradka. Centr skončany. Napieradzie – industryjalny Minsk. Vakoł znachodziacca zavody i fabryki. Ale nie ŭsio ž turystu praśpiekty dy cerkvy pakazvać?

Sierabranka. Minsk viaskovy i Minsk spalny

Nieŭzabavie

turyst zmoža ŭbačyć aharody za kracistaj aharodžaj litaralna ŭ dvuch-troch mietrach ad trasy.

Chutkaści ŭ ravarystaŭ na takich učastkach dachodziać da 30-35 km/h, a čałavieku z darohi adskočyć niama kudy.

Prajekciroŭščyki nie pradumali pavaroty. Niekatoryja ź ich davoli rezkija, i ŭ dadatak zakrytyja drevami. Kali z dvuch bakoŭ vylecić pa viełasipiedyście — čakaj niepryjemnaściaŭ. Zrešty, napaminy pra biaśpieku jość. U miescach, dzie trasa padychodzić da vady vielmi blizka, staić aharodža.

Budaŭniki staralisia zrabić trasu roŭnaj, i im heta ŭdałosia. Sierabranka — adziny ŭzhorysty rajon na ŭsioj praciahłaści darohi.

Daroha abychodzić damy spalnaha rajonu zboku i rušyć ŭ bok da Čyžoŭskaha vadaschovišča. Upieradzie bačna niejkaje razvarotnaje koła. Padjazdžaju, i tut stanovicca zrazumiełym, što

tut trasa skančvajecca. Prama ŭ čystym poli.

Zabaŭka, a nie dapamoha

Prychodzicca razvaročvacca i jechać u advarotny bok. Ale tut uźnikaje prablema, jak viartacca damoŭ? Trasa ŭzvodziłasia z nadziejaj, što ravarysty pierastanuć hojsać pa darohach pierad aŭtamabilami.

Prakacicca praz uvieś horad cikava, ale inačaj čym zabaŭkaj, viełatrasu nazvać nielha.

* * *

Što možna ŭbačyć pa darozie?

Kamsamolskaje voziera
Steła horad-hieroj «Minsk»
Pałac sportu
Vostraŭ śloz
Trajeckaje pradmieście
Kafiedralny sabor
Park imia Ja.Kupały, pomnik Kupału i plener skulpturaŭ
Park imia M.Horkaha
Stadyjon «Dynama»

• 0
• 0
• 0
• 0
• 0
• 0
• 0
• 0