U lipieni ŭ Vilni projdzie samit NATA. Žycharoŭ horada čakajuć abmiežavańni
Doŭhi čas pra padrabiaznaści padrychtoŭki da samitu NATA ŭ Vilni, što projdzie 11-12 lipienia, nie havaryli. Ciapier stali viadomyja niekatoryja niuansy: žychary nie zmohuć trapić u Stary horad, buduć začynienyja i inšyja terytoryi ŭ horadzie, paviedamlaje Delfi.lt.
Raniej MZS Litvy raiła žycharam pakinuć horad na čas samitu. Paśla hetaha pra detali doŭhi čas nie paviedamlałasia. Narešcie municypalitet padzialiŭsia niekatorymi płanami. «Padrabiaznaja infarmacyja pra abmiežavańnie ruchu źjavicca paźniej, pa miery nabližeńnia mierapryjemstva. Ale ŭžo ciapier viadoma, što padčas samitu NATA budzie abmiežavana pieramiaščeńnie ŭsich udzielnikaŭ ruchu pa Starym horadzie, u miežach vystavačnaha centra Litexpo, na terytoryi aeraporta, u asobnych miescach Naŭjamieścisa», — paviedamlaje municypalitet.
Praŭda, kiroŭcy sa śpiecyjalnymi dazvołami ŭ hetyja miescy zmohuć prajechać. Bolš padrabiaznaściaŭ stanie viadoma paźniej.
Taksama 11-12 lipienia ŭ radyusie 30 km ad Litexpo buduć zabaronienyja ŭsie paloty. Zabarona budzie dziejničać z 12 hadzin 11 lipienia da 14 hadzin 12 lipienia. Akramia taho, u lipieni padčas samitu abmiažujuć praviadzieńnie płanavych pasłuh u balnicach.
Samit NATA ŭ Litvie praviaduć upieršyniu. Heta budzie najbujniejšaje mierapryjemstva ŭ historyi Litvy, čakajuć 40-50 zamiežnych delehacyj (da 3000 haściej) i 2000 pradstaŭnikoŭ niaŭradavych delehacyj i zamiežnych ŚMI.
Byłoha sienatara i dyrektara najbujniejšaha ŭ Biełarusi vytvorcy budmateryjałaŭ sudziać za razhałošvańnie słužbovaj tajny2
Kamientary