Łukašenka pierasłaŭ u Braziliju padarunak, jaki naŭrad ci tam aceniać
Pres-słužba MZS paviedamiła, što Łukašenka pieradaŭ prezidentu Brazilii Łuisu Inasiu Łuła da Siłvu ad siabie pamiatny padarunak. U jakaści padarunka vystupaje chakiejny śvitar amatarskaj kamandy Łukašenki. Uličvajučy śpiecyfiku hetaj krainy, vybar prezienta jak minimum dziŭny.
![](http://nashaniva.com/img/w732d4webp1/photos/z_2023_07/dzhersi_lukashenko_braziliya_2023_1-1nwj0.jpg.webp)
Reč u tym, što chakiej z šajbaj — vid sportu, jaki nie tolki ŭ Brazilii, ale i va ŭsioj Paŭdniovaj Amierycy nie maje papularnaści i faktyčna nie raźvivajecca. Farmalna nacyjanalnaja spartyŭnaja fiederacyja hetaj krainy była pryznanaja IICHF jašče ŭ 1984 hodzie, ale z taho času brazilcy nikoli nie rabili sprobaŭ surjozna vyjści na mižnarodnuju arenu. Uvohule pieršuju hulniu jany praviali tolki ŭ 2014 hodzie sa zbornaj Mieksiki, prajhraŭšy 0:16.
U sučasnaj struktury chakiejnych čempijanataŭ śvietu jość piać dyvizijonaŭ roznaha ŭzroŭniu. U najnižejšym, IV, sioleta hulali kamandy takich «chakiejnych» krain, jak Kuviejt, Manholija, Indaniezija i Filipiny. Ale brazilcy, jak i inšyja paŭdniovaamierykancy, nie zajaŭlajucca navat tudy — nastolki hety vid sportu ŭ ich niepapularny.
![](http://nashaniva.com/img/w732d4webp1/photos/z_2023_07/2023_iihf_participants-3g1kg.png.webp)
Darečy, adchilenaja ad mižnarodnych spabornictvaŭ razam ź Biełaruśsiu Rasija ŭ jakaści alternatyvy choča arhanizavać chakiejny turnir u ramkach arhanizacyi BRIKS, u jakuju ŭvachodziać, akramia Rasii, Brazilija, Indyja, Kitaj i Paŭdniovaafrykanskaja Respublika. Na vyšejpadadzienaj karcie možna nahladna acanić uzrovień hetaha turniru, kali jaho ŭdasca ŭvasobić u realnaść.
Kamientary