U Brytanii zaviałasia čajka-zładziužka, jakaja kradzie z kramy adzin i toj ža tavar VIDEA
Z ptuškaj zmahalisia roznymi sposabami, ale heta nie dapamahło. Maleńkamu złodzieju ŭžo dali imia.
U brytanskim horadzie Uejmut, što na poŭdni krainy, papularnaść nabyła chitraja čajka, jakaja ŭžo niekalki miesiacaŭ kradzie čypsy stroha peŭnaj marki i smaku ź miascovaj charčovaj kramy.
Ptušku-zładziužku ŭ sacsietkach prazvali «čajka Styvien» («Steven Seagull»), što na anhlijskaj movie suhučna poŭnamu imiu viadomaha amierykanskaha akciora Styviena Sihała, jaki ciapier žyvie ŭ Rasii.
Na adnym ź videa bačna, jak Styvien zachodzić u kramu i kradzie adtul čypsy, a zatym hučna rahoča.
«Styvien asabliva lubić čypsy sa smakam jałavičyny i barbiekiu. Za apošnija dva miesiacy hetaja chitraja ptuška, nie saromiejučysia, skrała kala 30 pakietaŭ čypsaŭ. Ja sprabavaŭ rastłumačyć prablemu ŭładam, ale jany ŭ adkaz śmiajucca», — paskardziŭsia mieniedžar paciarpiełaj kramy Ściuart Chamier, pieradaje ahienctva Bi-bi-si.
Pa słovach Chamiera, sa Styvienam sprabavali zmahacca niekalkimi sposabami.
Spačatku supracoŭniki mahazina padmianiali lubimyja čypsy čajki na vostryja, adnak ptuška zaŭvažała padman i ŭsio roŭna daciahvałasia da patrebnych joj pakietaŭ.
Zatym na ŭvachodzie ŭ kramu było vyviešana piśmovaje papiaredžańnie z vyjavaj Styviena, kab klijenty začyniali za saboj dźviery i tym samym «nie prapuskali miascovaha zładziužku ŭnutr».
Adnak, naparoŭšysia na začynienyja dźviery, čajka hučna stukaje pa ich dziubaj, kab joj adkryli, i potym usio roŭna kradzie čypsy, kab pajeści ich razam sa svaimi siabrami, raspaviadaje mieniedžar kramy.
Dahetul tak i nie było znojdziena efiektyŭnych sposabaŭ spynić ptušku.
«Čajki i spajs — nie vielmi dobraje spałučeńnie». U Vialikabrytanii ptuški pačali kraści spajs i abkuranymi napadać na ludziej
«Akieła pramachnuŭsia». U siecivie zavirusiłasia paciešnaje VIDEA, jak brescki kot palavaŭ na busła
Vyśvietliłasia sapraŭdnaja pryčyna anamalnych napadaŭ zhraj kasatak na raskošnyja jachty ŭ jeŭrapiejskich vodach
Kamientary