ZŠA zastanucca addanymi duchu dyjałohu ź Biełaruśsiu, jaki pryviadzie da supracoŭnictva na karyść dźviuch krain. Pra heta zajaviŭ časovy pavierany ŭ spravach ZŠA ŭ Biełarusi Majkł Skenłan 1 lipienia na pryjomie ŭ honar Dnia niezaležnaści ZŠA.
«Jak Tadevuš Kaściuška, jaki naradziŭsia na terytoryi sučasnaj Biełarusi, usio svajo žyćcio pryśviaciŭ svabodzie i demakratyi, tak i ZŠA zastanucca addanymi duchu dyjałohu, jaki zasnavany na kaštoŭnaściach i pryviadzie da supracoŭnictva na karyść dźviuch krain», — skazaŭ Skenłan.
«Siońnia my adznačajem nie tolki dasiahnieńni Amieryki i jaje baraćbu, my taksama adznačajem namahańni i addanaść tych, chto pryśviaciŭ siabie spravie demakratyi ŭ Biełarusi», — adznačyŭ časovy pavierany.
Jon padkreśliŭ, što ciapierašni Dzień niezaležnaści ZŠA apošni raz adznačajecca ŭ rezidencyi amierykanskaha pasła ŭ Raŭbičach. «Z sakavika 2008 hoda jana pustavała. Nam budzie škada ŭ chutkim časie pazbavicca hetaha doma, jaki bačyŭ mnohija pryjomy i sustrečy ŭ honar našych biełaruskich siabroŭ i kaleh, pradstaŭnikoŭ usich śfier žyćcia i hramadstva.
Na žal, apošnija dva hady byli časam stračanych mahčymaściej u adnosinach pamiž našymi krainami», — skazaŭ Skenłan.
Adnosiny Biełarusi i ZŠA pahoršylisia ŭ sakaviku 2008 hoda paśla apublikavańnia ŭdakładnieńniaŭ da sankcyj adnosna dziaržaŭnaha kancerna »Biełnaftachim». 7 sakavika z Vašynhtona dla kansultacyj byŭ adklikany pasoł Biełarusi ŭ ZŠA Michaił Chvastoŭ. 12 sakavika pa nastajańni biełaruskaha boku Minsk pakinuła pasoł ZŠA Karen Ściuart. Zatym amierykanskamu boku było rekamiendavana skaracić kolkaść supracoŭnikaŭ dypmisii. 27 sakavika Minsk pakinuli 17 amierykanskich dypłamataŭ, rabotu pradoŭžyli 15 supracoŭnikaŭ. Jašče 11 amierykanskich dypłamataŭ pakinuli Minsk pa prapanovie biełaruskaha boku 3 maja 2008 hoda.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ150
Kamientary