Pamiatajecie, «Arešnik» upaŭ na haražy pad Kijevam? Ukraincy raskazali, jakaja sistema dazvoliła adchilić rakietu ad vajennaj celi

Ujavicie: vy jedziecie pa ŭkrainskaj darozie z chutkaściu kala 60 km/h, i raptam hučyć pavietranaja tryvoha. Praź imhnieńnie navihatar pakazvaje, što mašyna lacić nad Paŭdniovaj Amierykaj z chutkaściu amal 270 km/h i voś-voś «pryziamlicca» ŭ Limie.

Mienavita heta adbyłosia z žurnalistami The New York Times. Dla mnohich kijaŭlan padobnyja zboi ŭžo stali zvyčajnaj spravaj. Jany ŭskładniajuć pracu taksistaŭ i kurjeraŭ, a ŭładalnikaŭ smartfonaŭ i spartyŭnych hadzińnikaŭ adpraŭlajuć u virtualnyja padarožžy za 12 tysiač kiłamietraŭ, u stalicu Pieru. Kab nie zabłukać, ludzi ŭsio čaściej karystajucca papiarovymi kartami, zahadzia zahružajuć afłajn-mapy abo prosta zapaminajuć maršrut pierad pajezdkaj.

Pryčyna hetych niazručnaściaŭ davoli niečakanaja: tak pracuje ŭkrainskaja sistema abarony ad rasijskich rakiet i bieśpiłotnikaŭ.

Jak padmanuć rakietu

Rasijskija rakiety i bieśpiłotniki aryjentujucca ŭ tym liku pa spadarožnikavych sihnałach, jak i zvyčajnyja navihatary. Ukrainskaja sistema nie prosta hłušyć hetyja sihnały, a padmianiaje ich falšyvymi. U vyniku zbroja atrymlivaje niapravilnyja źviestki pra svajo miescaznachodžańnie i moža źbicca z kursu. Takaja padmiena nazyvajecca spufinham.

Na hetym pryncypie pracuje ŭkrainskaja sistema radyjoelektronnaj baraćby Lima, raspracavanaja kampanijaj Cascade Systems. Amal čatyry hady tamu jaje śpiecyjalisty pačali stvarać anteny, zdolnyja źbivać z kursu rasijskuju zbroju. Da pracy dałučyłasia padraździaleńnie terytaryjalnaj abarony «Načnaja varta», jakoje dapamahała ŭdaskanalvać sistemu.

Pieršyja viersii parušali navihacyju častki rasijskich dronaŭ i kryłatych rakiet. Adnak rasijanie pastupova prystasoŭvalisia da pieraškod, u pryvatnaści, ustaloŭvali na zbroju dadatkovyja anteny. U adkaz ukrainskija inžyniery praciahvali ŭdaskanalvać svaju raspracoŭku.

U žniŭni 2025 hoda vakoł Kijeva razharnuli novuju viersiju sistemy — Lima Quant. Jaje anteny pracujuć razam, stvarajučy nad stalicaj svojeasablivy kupał elektramahnitnych pieraškod.

Čamu mienavita Lima

Spačatku raspracoŭščyki chacieli padmianiać kaardynaty pa-roznamu dla kožnaha ŭkrainskaha horada. Adzin navihatary pavinny byli pieranosić da łondanskaha Taŭera, druhi — na Evierest, treci — da znakamitaj Alei baababaŭ na Madahaskary.

Ale ŭ vyniku vyrašyli vykarystoŭvać adnu kropku — Limu. Jana znachodzicca vielmi daloka ad Ukrainy, a falšyvyja kaardynaty stali svojeasablivym podpisam sistemy, jaki dazvalaje adroźnivać jaje pracu ad inšych srodkaŭ radyjoelektronnaj baraćby.

Kamandzir «Načnoj varty» z pazyŭnym Ałchimik nazyvaje heta «paschałkaj», jakuju raspracoŭščyki zakłali ŭ sistemu jašče na pačatku.

Pavodle kampanii Cascade Systems, tolki za pieršyja try miesiacy 2026 hoda Lima dapamahła advieści ad celaŭ bolš za 30 kryłatych rakiet i 10 tysiač bieśpiłotnikaŭ.

Ałchimik śćviardžaje, što z 62 hipierhukavych rakiet «Kinžał», jakija pralatali praz zony dziejańnia Lima Quant, 33 razvalilisia ŭ pavietry, a inšyja adchililisia ad zadadzienych maršrutaŭ. Pavodle raspracoŭščykaŭ, padmiena kaardynataŭ moža prymusić rakietu rezka źmianić trajektoryju, što časam pryvodzić da jaje razbureńnia.

Pavodle Ałchimika, najbolš pakazalnym vypadkam stała ataka 24 maja 2026 hoda, kali Rasija vypuściła pa Kijeŭskaj vobłaści dźvie najnoŭšyja balistyčnyja rakiety «Arešnik». Maskva śćviardžała, što hetyja rakiety raźvivajuć takuju chutkaść, što amierykanskija kompleksy Patriot nie mohuć ich pierachapić.

Pa słovach Ałchimika, ukrainskija vajskoŭcy zahadzia atrymali ad amierykanskaj raźviedki papiaredžańnie pra zapusk i vykarystali suprać rakiet sistemu Lima Quant. Pavodle jaho, pieršuju rakietu ŭdałosia advieści ad vajennaj celi, i jana trapiła ŭ haražy za niekalki kiłamietraŭ ad jaje. Druhaja razvaliłasia ŭ pavietry, a jaje abłomki ŭpali na akupavanaj Rasijaj terytoryi.

Žurnalistam NYT udałosia pabyvać na pazicyi, dzie pracavali šeść anten Lima Quant. Na vyhlad jany akazalisia zusim nieprykmietnymi. Vajskoŭcy nie stali padrabiazna pakazvać abstalavańnie, ale zapeŭnili, što karyść ad sistemy značna pieravyšaje niazručnaści, jakija jana stvaraje dla mirnych žycharoŭ. Asabliva ciapier, kali Ukraina adčuvaje deficyt rakiet-pierachopnikaŭ dla Patriot.

Zrešty, ad niečakanych nastupstvaŭ pracy Lima nie zastrachavanyja i sami vajskoŭcy. Adzin ź ich raskazaŭ pra znajomaha, čyj novy BMW raptam zapatrabavaŭ terminovaha techničnaha absłuhoŭvańnia. Aŭtamabil vyrašyŭ, što ŭžo prajechaŭ ad Limy kala 10 tysiač kiłamietraŭ biez zamieny alivy.

• 0
• 0
• 0
• 0
• 0
• 0
• 0
• 0