Hramadstva

«Na žal, mnohija ludzi navat nie viedajuć słova «bareljef». Jak biełaruska stvaraje tvory mastactva z hipsu

Anastasija Kierhiet paśla zakančeńnia ŭniviersiteta dva hady pracavała jurystam u Biełarusi. Potym zrazumieła, što jurysprudencyja — heta nie jaje. Biełaruska zaniałasia stvareńniem bareljefaŭ. Jaje pracy ŭpryhožvajuć niekalki biełaruskich čyhunačnych vakzałaŭ, a ciapier afarmlaje restarany i miedycynskija centry ŭ Polščy.

 

U intervju spravy.io Anastasija raskazała, kolki kaštuje stvareńnie bareljefa i čamu nie ŭsie ludzi viedajuć, što heta takoje.

«Nie stała admaŭlacca, a vyrašyła ryzyknuć»

— Kali pracavała jurystam, to nie adčuvała, što znachodžusia na svaim miescy, i nie chacieła dalej raźvivacca ŭ hetaj prafiesii.

Znajomstva z bareljefami pačałosia ŭ 2015 hodzie zusim vypadkova — u mianie spytali, ci zmahu ja zrabić bareljef. Na toj momant navat nie ŭjaŭlała, jak mienavita stvarajucca takija pracy i jakija materyjały patrebnyja. Ale ŭ dziacinstvie naviedvała mastackuju škołu, tamu peŭnyja navyki malavańnia byli. I vyrašyła ryzyknuć — nie admoviłasia, a skazała: «Dobra, ja pasprabuju».

Z hetaha pačałosia samastojnaje navučańnie: šukała infarmacyju ŭ internecie, čytała artykuły, hladzieła videa na YouTube. Tady materyjałaŭ było vielmi mała, tamu šmat čaho davodziłasia spaścihać mietadam sprob i pamyłak.

Pieršuju pracu zrabiła na zvyčajnym liście hipsakardonu — heta byŭ zamak. Vynik spadabaŭsia i navakolnym, i mnie samoj. Ale hałoŭnaje — ja atrymała zadavalnieńnie ad pracesu i adčuła, što znajšła zaniatak, jaki sapraŭdy zachaplaje.

Pačała hłybiej vyvučać techniku, ekśpierymientavać z materyjałami, asvojvać novyja pryjomy, bracca za bolš składanyja pracy. Zrabiła niekalki bareljefaŭ svajakam. Tak zusim niečakana zachapleńnie pieratvaryłasia ŭ spravu majho žyćcia. Ja kančatkova pakinuła jurysprudencyju i pryśviaciła siabie tvorčaści.

— Što takoje bareljef?

— Heta abjomnaja karcina na ścianie, jakaja stvarajecca z hipsu abo inšych materyjałaŭ. U adroźnieńnie ad zvyčajnaj płoskaj karciny, tut vyjava nie prosta namalavanaja. Jana vystupaje nad pavierchniaj ściany, stvarajučy abjom, hłybiniu i hulniu śviatła i cieniu.

Ja rablu bareljefy całkam uručnuju. Nie vykarystoŭvaju silikonavyja formy, hatovyja elemienty abo narychtoŭki. Usio, ad ahulnaj kampazicyi da samych drobnych detalaŭ, laplu ŭłasnymi rukami niepasredna na ścianie. Paśla lepki praca prachodzić niekalki etapaŭ apracoŭki: hruntujecca, umacoŭvajecca achoŭnymi srodkami i farbujecca.

Hałoŭnaja asablivaść maich bareljefaŭ — unikalnaść. Heta nie reč masavaj vytvorčaści, jakuju možna kupić u kramie, a tvor mastactva, stvorany śpiecyjalna dla peŭnaj prastory. Navat kali zachaču paŭtaryć adnu sa svaich prac, dakładnaj kopii ŭsio roŭna nie atrymajecca.

Afarmleńnie restarana ŭ 2024 hodzie

Stvareńnie bareljefa — vielmi karpatlivy i technična składany praces. Kožny vyhin, faktura, listočak abo pialostak farmujucca i prapracoŭvajucca ŭručnuju. U hetym, na moj pohlad, i palahaje kaštoŭnaść takoj pracy.

— Jakija byvajuć bareljefy i dla jakich pamiaškańniaŭ jany padychodziać?

— Zusim roznyja: kvietkavyja kampazicyi, piejzažy, architektura, vyjavy ludziej i žyvioł, abstraktnyja formy abo cełyja siužetnyja karciny.

Afarmleńnie restarana ŭ 2024 hodzie

Kali kazać pra prymianieńnie, to bareljefy možna stvarać jak unutry pamiaškańniaŭ, tak i zvonku. Naprykład, na fasadach budynkaŭ. Ja śpiecyjalizujusia mienavita na interjernych bareljefach. Ich možna vykarystoŭvać praktyčna ŭ luboj prastory: u pryvatnych damach i kvaterach, restaranach, hatelach, sałonach pryhažości, bucikach, klinikach, ofisach i na čyhunačnych vakzałach.

«Pradstaŭniki čyhunki sami znajšli mianie praz moj sajt»

— Jak vy atrymali zakaz na stvareńnie bareljefaŭ na biełaruskich vakzałach?

— Pieršy taki bujny prajekt źjaviŭsia ŭ Rahačovie dziakujučy dziaržaŭnamu konkursu, jaki pravodziła Biełaruskaja čyhunka. Pradstaŭniki čyhunki sami znajšli mianie praz moj sajt, patelefanavali i prapanavali paŭdzielničać u konkursie eskizaŭ dla mastackaha afarmleńnia. Na toj momant u Biełarusi było niašmat majstroŭ, jakija prafiesijna zajmalisia bareljefami. Znajści vykanaŭcaŭ, dumaju, było niaprosta.

Čyhunačnaja stancyja ŭ Rahačovie, 2018 hod

Dali čas na raspracoŭku eskizaŭ. Ja pradumała kampazicyju, namalavała varyjanty, i ŭ vyniku moj prajekt pieramoh. Akramia mianie, konkurs vyjhrała jašče adna kamanda ź Minska. My padzialili pracu: ja ŭziałasia za zały čakańnia, a minskaja kamanda zajmałasia pamiaškańniem pry ŭvachodzie.

Čyhunačnaja stancyja ŭ Rahačovie, 2018 hod

Ja z Baranavičaŭ, tamu jechać u Rahačoŭ było dla mianie dalokaj kamandziroŭkaj, kab stvarać bareljef na miescy. Praca nad takim maštabnym prajektam patrabavała vialikaj adkaznaści, bo vakzał — heta hramadskaje miesca, praź jakoje štodzień prachodzić vialikaja kolkaść ludziej. Chaciełasia zrabić nie prosta dekaratyŭnuju pracu, a niešta asablivaje, što budzie ŭpryhožvać budynak doŭhija hady.

— Jakija jašče bareljefy vy stvarali dla biełaruskich vakzałaŭ?

— Paśla Rahačova źjaviŭsia zakaz na afarmleńnie čyhunačnaha vakzała ŭ Słonimie da Dnia biełaruskaha piśmienstva. Ja znoŭ pieramahła ŭ konkursie Biełaruskaj čyhunki i stvaryła tam niekalki kampazicyj. Adna ź ich była pryśviečana historyi horada i jaho architekturnym słavutaściam. Chaciełasia pieradać histaryčnuju atmaśfieru Słonima, pakazać jaho paznavalnyja budynki i kulturnuju spadčynu.

Čyhunačnaja stancyja ŭ Słonimie, 2019 hod

U druhoj zale ja pracavała nad tradycyjnymi biełaruskimi matyvami: z busłami, hniazdom i siamjoj. Busły dla mianie — vielmi pryhožy simvał Biełarusi, jaki asacyjujecca z rodnym domam i ciapłom.

Trecim prajektam dla čyhunki stała afarmleńnie zały čakańnia na vakzale ŭ Haradziei, niedaloka ad Niaśviža. Tam ja stvarała bareljefy z vyjavami dvuch znakamitych architekturnych pomnikaŭ — Mirskaha i Niaśvižskaha zamkaŭ.

Čyhunačnaja stancyja ŭ Haradziei, 2020 hod

Mnie padabałasia pracavać nad hetymi prajektami, bo jany byli źviazany z historyjaj i kulturaj Biełarusi. U mianie źjaviłasia mahčymaść praz mastactva raskazać pra našu krainu.

Čyhunačnaja stancyja ŭ Haradziei, 2020 hod

— Jakija jašče cikavyja zakazy byli ŭ vašaj praktycy?

— Kožny zakaz pa-svojmu admietny. Siarod dziaržaŭnych zakazaŭ značnymi stali mienavita prajekty na vakzałach. Akramia ich, ja afarmlała restaran. Bolšaja častka maich prac u Biełarusi stvarałasia dla pryvatnych interjeraŭ — damoŭ i kvater.

2016 hod

U 2019 hodzie firma, jakaja rabiła ŭ Žyrovičach ramont da 500‑hodździa manastyra, šukała majstra dla stvareńnia bareljefa. Znajšli mianie, i ja biaspłatna zrabiła dla manastyra dźvie karciny — z vyjavami Isusa i Božaj Maci. Ich možna ŭbačyć tam, dzie znachodzicca krynica.

«Dziakujučy ChatGPT nam z zakazčykam značna praściej zrazumieć adno adnaho»

— Jak stvarajecca bareljef?

— Usio pačynajecca ź idei. Jana nikoli nie isnuje asobna ad pamiaškańnia, bo bareljef pavinien harmanična ŭpisvacca ŭ interjer.

Pieršy etap — znajomstva z prastoraj. Ahladaju pamiaškańnie. Vyvučaju jaho asablivaści, vyznačaju, na jakoj ścianie lepš raźmiaścić pracu, jakoha pamieru jana pavinna być i jak budzie vyhladać u interjery. Heta vielmi važna. Navat samaja pryhožaja kampazicyja moža vyhladać niaŭdała, kali niapravilna vybrać miesca abo praporcyi.

Druhi etap — raspracoŭka kancepcyi. Kali ŭ zakazčyka jość hatovy dyzajn-prajekt, aryjentujusia na jaho. Kali nie — abmiarkoŭvajem pažadańni, styl pamiaškańnia, nastroj i mahčymyja siužety.

Vizualizacyja, stvoranaja pry dapamozie ŠI

Raniej hety praces byŭ bolš składanym: ja prydumlała kampazicyi ŭ hałavie, malavała ad ruki, šukała patrebnyja vyjavy ŭ internecie i spałučała roznyja elemienty. Ciapier sučasnyja technałohii značna spraścili padrychtoŭku — naprykład, vykarystoŭvaju ChatGPT dla vizualizacyi idej. Apisvaju słovami elemienty, ich raźmiaščeńnie i nastroj, a potym dapracoŭvaju atrymanyja malunki.

Heta vielmi zručna. Kali tłumačyš zadumu na słovach, u kožnaha ŭ hałavie ŭźnikaje svoj vobraz. A tak mahu adrazu pakazać niekalki varyjantaŭ. Zakazčyki taksama mohuć sami zhienieravać vyjavy i pakazać, što im padabajecca. Dziakujučy hetamu nam značna praściej zrazumieć adno adnaho. Viadoma, sama ideja, kampazicyja, mastackaje rašeńnie i realizacyja zastajucca majoj tvorčaj pracaj. Štučny intelekt — tolki instrumient.

Vizualizacyja, stvoranaja pry dapamozie ŠI

Treci etap — stvareńnie eskiza i vizualizacyi. Kali kancepcyja vyznačana, ja maluju paŭnavartasny eskiz na hrafičnym płanšecie ŭ maštabie i z realnymi pamierami budučaha bareljefa. Zatym rablu vizualizacyju, kab zakazčyk ubačyŭ, jak mienavita praca budzie vyhladać na jaho ścianie. Uzhadniajem detali, pry nieabchodnaści ŭnosim źmieny, paśla čaho padpisvajem damovu, i ja biarusia za spravu.

Dalej pačynajecca samaja pracajomkaja častka — lepka i azdableńnie. Ja ŭručnuju farmuju abjom kampazicyi z hipsu, prapracoŭvaju reljef i vyrazaju drobnyja detali. Kali hips całkam vysach, pačynajecca finišnaja apracoŭka: hruntavańnie, umacavańnie pavierchni i farbavańnie.

— U vas jość svaja majsternia?

— Nie, i patreby ŭ joj nikoli nie było. Pakolki ja nie adlivaju adnolkavyja dekaratyŭnyja detali, a laplu ŭsio ŭručnuju niepasredna na miescy, z ulikam architektury i pamieraŭ kankretnaj prastory, majoj majsterniaj na čas pracy stanovicca samo pamiaškańnie zakazčyka.

— Jakija materyjały vykarystoŭvajecie?

— Asnoŭny materyjał — hips. Za hady praktyki sprabavała roznyja techniki i materyjały, ale mienavita hips staŭ maim lubimym. Jon dazvalaje stvarać jak bujnyja abjomnyja formy, tak i vielmi tonkuju, praktyčna juvielirnuju detalizacyju. Akramia taho, heta naturalny minieralny materyjał, jaki vydatna padychodzić dla ŭnutranaha azdableńnia: pry pravilnaj technałohii jon tryvały i daŭhaviečny.

— Kolki času zajmaje stvareńnie bareljefa?

— Usio vielmi indyvidualna i zaležyć ad pamieru pracy, składanaści kampazicyi i kolkaści drobnych detalaŭ. Prostaja abstraktnaja kampazicyja biez składanaj architektury i pierśpiektyvy moža zaniać prykładna dva tydni. Kali heta składany siužet z architekturaj, hieamietryjaj, pierśpiektyvaj, tvarami ludziej abo mnostvam drobnych elemientaŭ, praces raściahvajecca.

Terminy vyznačaje nie tolki chutkaść maich ruk, ale i toje, nakolki chutka sochnie hips. Nielha skončyć lepku i adrazu pačać farbavać — treba vytrymlivać technałohiju i čakać poŭnaha vysychańnia. Na heta ŭpłyvajuć tempieratura, vilhotnaść pavietra i pravietryvańnie. Uletku praca zvyčajna idzie chutčej, a ŭ vilhotnym pamiaškańni hips sochnie daŭžej.

«Upieršyniu vykarystoŭvaju intehravanuju dekaratyŭnuju padśvietku bareljefa»

— Jakija bareljefy vy stvaryli ŭ Polščy?

— Udałosia realizavać niekalki zusim roznych prajektaŭ: afarmleńnie restarana polskaj kuchni, restarana hruzinskaj kuchni, a taksama dva prajekty dla klinik. Ciapier pracuju nad trecim restaranam — znoŭ z hruzinskaj tematykaj.

U kožnym ź ich byli novyja tvorčyja zadačy, sprabavała toje, čaho raniej nie rabiła. Naprykład, u adnoj z klinik zajmałasia mastackim afarmleńniem zony rehistracyi. Razam z dyzajnieram prydumali ekskluziŭnaje rašeńnie admysłova dla hetaha interjeru — takoj zony bolš nidzie niama. Mnie vielmi padabajecca stvarać rečy, jakija niemahčyma prosta kupić u kramie abo paŭtaryć u inšym miescy.

U druhoj klinicy ja zrabiła vielmi piaščotny i simvaličny bareljef — vobraz maci ź niemaŭlom na rukach. U asnovie kampazicyi — ideja maciarynstva, novaha pačatku i vobraz dreva žyćcia. Atrymałasia kranalnaja, spakojnaja praca z hłybokim sensam — zusim inšaja tematyka i nastroj u paraŭnańni z maimi papiarednimi prajektami.

Asobnaje miesca ŭ majoj tvorčaści zajmajuć hruzinskija restarany. Mnie vielmi blizkaja pryrodnaja tematyka, tamu pracavać nad takimi kampazicyjami asabliva pryjemna.

U prajekcie, nad jakim pracuju ciapier, upieršyniu vykarystoŭvaju intehravanuju dekaratyŭnuju padśvietku bareljefa. Heta zusim novy dla mianie dośvied. Śviatło budzie padkreślivać abjom, hłybiniu i fakturu reljefu, stvarać vyraznyja cieni i vyłučać asobnyja elemienty. U zaležnaści ad intensiŭnaści aśviatleńnia bareljef budzie vyhladać pa-roznamu, a ściana stanie jarkim akcentam interjeru. Mnie vielmi padabajecca ekśpierymientavać z takimi rašeńniami — jany adkryvajuć novyja mahčymaści.

— Ź inšych krain zakazy pastupali?

— Ciapier maja dziejnaść abmiažoŭvajecca Polščaj. Chacia ŭžo źviartalisia ludzi ź inšych krain z prapanovami supracy. Na žal, jak i ŭ mnohich biełarusaŭ, maje dakumienty na lehalizacyju znachodžańnia ŭžo šmat miesiacaŭ znachodziacca na razhladzie. Praz heta pakul nie mahu svabodna vyjazdžać za miežy Polščy, ale ŭ budučyni chaciełasia b pašyryć hieahrafiju pracy.

— Jak vy šukajecie zakazčykaŭ i prasoŭvajecie svaju dziejnaść?

— Sprabavała roznyja sposaby: rekłamu ŭ Google, prasoŭvańnie ŭ Instagram i Facebook, navat raspaŭsiudžvała rekłamnyja ŭlotki.

Vyjści na novy rynak, dzie ciabie nichto nie viedaje, — niaprostaja zadača, asabliva ŭ takim niezvyčajnym kirunku. Adna z hałoŭnych składanaściaŭ — danieści da ludziej samu ideju, što doma, u restaranie abo ofisie možna zrabić unikalny tvor mastactva, stvorany śpiecyjalna dla hetaj prastory.

Mnohija ludzi navat nie viedajuć słova «bareljef» i nie ŭjaŭlajuć, jak jon moža vyhladać u sučasnym interjery. A tyja, chto znajomy z hetym paniaćciem, časta ŭjaŭlajuć niešta ź minułaha: bareljefy na staradaŭnich budynkach i kałonach, manumientalnyja savieckija kampazicyi abo staražytnahrečaskich bahoŭ.

Sučasny bareljef — heta zusim inšy kirunak. Jon moža być piaščotnym, minimalistyčnym, realistyčnym, abstraktnym, adlustroŭvać pryrodu, kvietki, hory, architekturu abo cełyja mastackija siužety. Dziakujučy sučasnym rašeńniam nakštałt dekaratyŭnaj padśvietki kampazicyi stanoviacca jašče bolš vyraznymi. Maja zadača ciapier — nie tolki šukać zakazčykaŭ, ale i znajomić ludziej z hetym vidam mastactva.

— Chto ciapier zakazvaje ŭ vas bareljefy?

— Bolšaść maich klijentaŭ u Polščy — ruskamoŭnyja. Palaki taksama cikaviacca maimi pracami, ale pakul ich siarod zakazčykaŭ značna mienš.

«Ceny na bareljefy pačynajucca ad 600 jeŭra za kvadratny mietr»

— Kolki kaštuje stvareńnie bareljefa i ad čaho zaležyć cana?

— Kožny bareljef — indyvidualnaja praca, tamu adzinaha prajs-lista ŭ mianie niama. Košt zaležyć ad składanaści kampazicyi, kolkaści drobnych detalaŭ, hłybini reljefu i abjomu pracy. Kali ŭ kampazicyi jość architekturnyja elemienty, składanaja hieamietryja, pierśpiektyva abo realistyčnyja tvary ludziej, heta patrabuje značna bolš času i dakładnaści.

Navat kali kazać pra zvyčajnyja kvietki, niemahčyma nazvać adnu canu. Kvietkavaja kampazicyja moža być jak łakaničnaj, tak i vielmi składanaj, z mnostvam pialostkaŭ i liścia. Tamu kožny prajekt raźličvaju indyvidualna, zychodziačy z zaćvierdžanaha eskiza, pamieraŭ i pažadańniaŭ zakazčyka.

Pačatkovy košt akreślić mahu: ceny pačynajucca ad 2800 złotych za kvadratny mietr, uklučajučy pracu i materyjały. Bolš detalizavanyja kampazicyi kaštujuć daražej.

— Stvareńnie bareljefaŭ — heta vaša asnoŭnaja praca? Nakolki heta vyhadna?

— Tak, heta maja prafiesijnaja dziejnaść i sprava žyćcia. Pakul nie mahu skazać, što zarablaju stolki, kolki chaciełasia b. Ale imknusia da hetaha. Mnie składana adnaznačna acanić, nakolki heta vyhadny biźnies, bo ja ŭsio jašče asvojvaju novy rynak. Hałoŭnaje — ja sapraŭdy lublu svaju pracu. Mnie padabajecca prydumlać kampazicyi, uvasablać idei i bačyć, jak zvyčajnaja ściana pieratvarajecca ŭ tvor mastactva. Ščyra kažučy, nie chacieła b zajmacca niečym inšym.

Hałoŭnaja ciažkaść ciapier u tym, što davodzicca praktyčna nanoŭ vybudoŭvać spravu ŭ inšaj krainie. U Biełarusi ja pracavała šmat hadoŭ, u mianie byli imia, partfolia, dośvied i reputacyja. Ludzi sami znachodzili mianie praz sajt abo pa rekamiendacyjach, nie patrabavałasia stolki vysiłkaŭ na rekłamu. U Polščy ŭsio pačynajecca z nula: inšaje hramadstva, inšyja praviły rynku, ludzi jašče nie viedajuć mianie i maich mahčymaściaŭ. Ja sama pakul vyvučaju, jak tut naładžany pracesy i jak lepš vybudoŭvać znosiny z zakazčykami.

Hety šlach nie zaŭsiody prosty. Ale ŭ mianie šmat tvorčych idej, baču vielizarny patencyjał svajho kirunku — asabliva ŭ afarmleńni restaranaŭ, hatelaŭ, klinik i hramadskich prastor. Vieru, što z časam usio atrymajecca.

«Mnohija ludzi navat nie zaŭvažajuć, kolki pryhažości chavajecca ŭ architektury vakoł nas»

— Jakija płany na budučyniu?

— Ciapier praciahvaju raźvivacca ŭ Polščy. Mnie padabajecca stvarać maštabnyja kampazicyi dla hramadskich prastor, jakija stanoviacca častkaj architektury i farmirujuć asablivuju atmaśfieru.

U dalokaj pierśpiektyvie chaču, kab maje pracy ŭpryhožvali abjekty i ŭ inšych krainach Jeŭropy. Mnie asabliva blizkija prajekty, źviazanyja z architekturaj, pryrodaj, historyjaj i kulturaj roznych narodaŭ. Chočacca rabić nie prosta dekaratyŭnyja pano, a kampazicyi ź idejaj i historyjaj. I, viadoma, chočacca, kab pra ručnuju lepku ŭ interjery daviedvałasia ŭsio bolš ludziej.

— Jakija bareljefy ŭ Biełarusi, Polščy abo inšych krainach vy paraili b pahladzieć?

— Składana vyłučyć niekalki kankretnych prac. Reljefnaje mastactva isnuje šmat stahodździaŭ, i ŭ roznych krainach šmat dzivosnych tvoraŭ. Navat u Varšavie, dzie ja ciapier žyvu, možna ŭbačyć vydatnyja prykłady — na Pałacy kultury i navuki abo na vulicach u starym horadzie.

U Biełarusi taksama vielmi šmat admietnaha reljefnaha mastactva — na fasadach budynkaŭ, pomnikach architektury i ŭ hramadskich prastorach. Kali prosta prajścisia pa praśpiekcie Niezaležnaści ŭ Minsku i ŭvažliva razhledzieć fasady, možna zaŭvažyć mnostva pryhožych dekaratyŭnych elemientaŭ i arnamientaŭ.

Z bolš maštabnych tvoraŭ možna zhadać manumient Pieramohi ŭ Minsku abo kompleks «Bresckaja krepaść». Tut važna razumieć, što heta pieravažna hareljefy, a nie bareljefy. Pamiž imi jość roźnica: u bareljefie vyjava vystupaje nad płoskaściu fonu nie bolš čym na pałovu svajho abjomu, a ŭ hareljefie — bolš čym napałovu, tamu fihury vyhladajuć značna bolš abjomnymi i mohuć praktyčna adździalacca ad fonu.

Siarod sučasnych majstroŭ, jakija mocna paŭpłyvali na mianie, abaviazkova chacieła b zhadać Hieorhija Tandašvili. Zusim niadaŭna jaho nie stała. Na maju dumku, heta vielizarnaja strata dla ŭsiaho śvietu dekaratyŭnaha mastactva. Sačyła za jaho tvorčaściu z samaha pačatku svajho šlachu. Vielmi chacieła trapić na jaho majstar-kłasy i paznajomicca asabista. Ale spačatku pieraškodziła pandemija, zatym pierajezd u inšuju krainu — na žal, ažyćciavić hetuju maru tak i nie ŭdałosia.

Mnohija ludzi navat nie zaŭvažajuć, kolki pryhažości chavajecca ŭ architektury vakoł nas. Časam dastatkova prosta padniać hałavu i ŭvažliva pahladzieć na fasady i frantony staradaŭnich budynkaŭ. Tam možna ŭbačyć dzivosnyja reljefy, čałaviečyja fihury, arnamienty i cełyja siužety, jakija niby raskazvajuć historyju horada. Ja vielmi lublu źviartać uvahu na takija detali. Napeŭna, heta ŭžo prafiesijnaja zvyčka — razhladać, jak majstar pieradaŭ abjom, prapracavaŭ fakturu i jak śviatło i cień padkreślivajuć kožnuju detal.

Kamientary

Ciapier čytajuć

«Samy niebiaśpiečny — Piatruchin. A bolšaść — karysnyja idyjoty». Admin kanała «Biełaruskaja ahientura» daŭ vialikaje intervju46

«Samy niebiaśpiečny — Piatruchin. A bolšaść — karysnyja idyjoty». Admin kanała «Biełaruskaja ahientura» daŭ vialikaje intervju

Usie naviny →
Usie naviny

Pucin zaklikaŭ ukraincaŭ pierachodzić «na pravilny bok historyi»11

Rabić vahony dla minskaha mietro znoŭ chočuć daručyć «Štadleru»6

«Biełtelekam» znoŭ abjaviŭ pra pavyšeńnie svaich taryfaŭ

Pad Barysavam upalavali pieršuju ŭ hetym siezonie ryś2

Analityka Volhu Charłamavu asudzili na 10 hadoŭ kałonii6

Biełarusy masava biaruć ilhotnyja kredyty pad 4%1

U internecie hałasujuć za turystyčny łahatyp Biełarusi. Siarod lidaraŭ prajekt byłoha palitviaźnia4

Dua Lipa ŭžo nosić kurtku, jakuju ŭsie zachočuć hetaj zimoj11

«Heta takaja drobnaja, ahidnaja pomsta Ramana». Sofja Sapieha raskazała, jak jaje padmanam źniali dla pieradačy Pratasieviča12

bolš čytanych navin
bolš łajkanych navin

«Samy niebiaśpiečny — Piatruchin. A bolšaść — karysnyja idyjoty». Admin kanała «Biełaruskaja ahientura» daŭ vialikaje intervju46

«Samy niebiaśpiečny — Piatruchin. A bolšaść — karysnyja idyjoty». Admin kanała «Biełaruskaja ahientura» daŭ vialikaje intervju

Hałoŭnaje
Usie naviny →

Zaŭvaha:

 

 

 

 

Zakryć Paviedamić