Źviazanyja z FSB chakiery pačali novuju sieryju atak na žurnalistaŭ i palitykaŭ pa ŭsim śviecie
Siarod celaŭ — Chrysta Hrozieŭ, suaŭtar «Panamskaha daśje» i supracoŭniki Le Monde.

Za apošnija dni stała viadoma adrazu pra niekalki fišynhavych atak na žurnalistaŭ. Ich zaznali rasśledavalnik Chrysta Hrozieŭ, niamiecki žurnalist i adzin z aŭtaraŭ «Panamskaha daśje» Bastyjan Obiermajer, supracoŭniki Le Monde, a taksama francuzski deputat, piša «Ahienctva»
Pavodle źviestak Le Monde, za sieryjaj atak staić chakierskaja hrupoŭka, jakuju ŭłady ZŠA źviazvajuć z pamiežnaj słužbaj, što ŭvachodzić u FSB.
18 listapada Hrozieŭ raskazaŭ, što atrymaŭ u Signal paviedamleńnie nibyta ad niamieckaha žurnalista, ź jakim nie kantaktavaŭ niekalki hadoŭ. Adpraŭnik zaprašaŭ jaho na videakanfierencyju. Hrozieŭ adkryŭ spasyłku ŭ izalavanym virtualnym asiarodździ i vyjaviŭ padroblenuju staronku Google Meet, jakaja pavinna była pieranakiravać jaho na falšyvuju staronku ŭvachodu ŭ Telegram dla kradziažu źviestak aŭtaryzacyi.
Hrozieŭ źviarnuŭ uvahu na ślady ruskaj movy: chakiery skapijavali ruskamoŭnuju viersiju Google Meet, a tekst zaprašeńnia ŭtrymlivaŭ nieŭłaścivyja dla anhlijskaj movy zvaroty, jakija nahadvali kalki z ruskaj.

«U hetym i palahaje vytančanaść — vybirajecca niechta z VAŠYCH kantaktaŭ, ale nastolki addaleny, što vy možacie pavieryć, nibyta ŭ jaho źjaviŭsia novy numar u Signal», — rastłumačyŭ Hrozieŭ.
U kamientarach da publikacyi niamiecki žurnalist Bastyjan Abiermajer, adzin z aŭtaraŭ rasśledavańnia Panama Papers, paviedamiŭ, što taksama atrymaŭ padobnaje paviedamleńnie. Jaho naściarožyła pamyłka ŭ imieni imaviernaha adpraŭnika. Hrozieŭ spytaŭ, ci supadaŭ tekst z atrymanym im zaprašeńniem. Abiermajer paćvierdziŭ, što paviedamleńni byli adnolkavymi.
17 listapada troje žurnalistaŭ Le Monde atrymali ŭ Signal zaprašeńni na videakanfierencyju pra vajnu va Ukrainie i rasijska-ŭkrainskija pieramovy. Paviedamleńni pryjšli nibyta ad znajomaha jeŭrapiejskaha žurnalista i ŭtrymlivali fišynhavuju spasyłku.

Siarod metaŭ chakieraŭ byŭ i francuzski deputat Eryk Batarel. Jamu z uzłamanaha Signal-akaŭnta znajomaha prapanavali ŭstupić u hrupu ŭ Telegram. Spasyłka viała na padroblenuju staronku miesiendžara, dzie patrabavałasia paznačyć numar telefona i kod paćviardžeńnia.
Pavodle źviestak Le Monde, ataki praciahvajucca jak minimum ź siaredziny kastryčnika. Chakieram udałosia atrymać dostup da akaŭnta kiraŭnika kampanii ŭ śfiery kibierbiaśpieki, udakładniaje vydańnie, ale nie nazyvaje jaho imia.
Francuzskim prychilnikam Ukrainy złamyśniki pisali ad imia asacyjacyi Pour l'Ukraine, pour leur liberté et la nôtre! U 2022 hodzie jana pieradała Mižnarodnamu kryminalnamu sudu materyjały pra vyvaz ukrainskich dziaciej u Rasiju. U sakaviku 2025 hoda rasijskaja hienprakuratura abviaściła arhanizacyju «niepažadanaj».
Hrozieŭ u svaim dopisie ŭ X piša, što heta «novaja fišynhavaja kampanija ad našych siabroŭ Fancy/Cozy/GummyBear na hetym tydni».
Krynicy Le Monde u jeŭrapiejskich słužbach biaśpieki adnieśli ataki da dziejnaści chakierskaj hrupy UNC5792, viadomaj taksama jak Frontier Blizzard i Sentry Bear. Hałoŭny analityk Google pa kibierpahrozach Džon Chałtkvist vyvučyŭ pieradadzienyja redakcyjaj techničnyja źviestki i paćvierdziŭ, što dziejańni złamyśnikaŭ adpaviadajuć mietadam hetaj hrupy.
U červieni FBR i ahienctva pa kibierbiaśpiecy ZŠA paviedamili, što supracoŭniki FSB, jakija pracujuć u pamiežnaj słužbie, i inšyja źviazanyja z rasijskimi śpiecsłužbami chakiery sprabujuć atrymać dostup da miesiendžaraŭ čynoŭnikaŭ, vajskoŭcaŭ, palitykaŭ i žurnalistaŭ. Amierykanskija viedamstvy źviazali hetyja apieracyi z hrupami UNC5792 i UNC4221. Jak piša Le Monde sa spasyłkaj na ŭłady ZŠA, za UNC5792 staić śpiechrupa ŭ adnym z padraździaleńniaŭ pamiežnaj słužby FSB.
Pra kampaniju UNC5792 Google papiaredžvaŭ jašče ŭ lutym 2025 hoda. Pavodle źviestak kampanii, u miežach jaje byli atakavanyja karystalniki Signal, najpierš ukrainskija vajskoŭcy. Tady chakiery padmianiali zaprašeńni ŭ hrupavyja čaty spasyłkami, jakija dazvalali padklučyć da akaŭnta pryładu złamyśnika i čytać pierapisku. Kampanija dapuskała raspaŭsiudžvańnie hetaha mietadu za miežy Ukrainy.
-
U Finskaj zatocy drony atakavali rasijskaje hruzavoje sudna, jakoje nakiroŭvałasia ŭ Kalininhrad
-
BepiColombo dalacieŭ da Mierkuryja — paśla vaśmi hadoŭ padarožža ŭ kosmasie jon vyjdzie na arbitu hetaj zahadkavaj płaniety
-
Miełanija Tramp zajaviła pra imaviernaje pieramirje va Ukrainie pierad Kaladami
Ciapier čytajuć
Prajektavali karoŭniki i akumulatarny zavod, a ciapier uzialisia za baroka. Ź vieličnaha jezuickaha kalehiuma ŭ Pinsku źbirajucca źbić uvieś tynk — a jon byŭ raśpisany freskami
Kamientary