Piatkievič: Tre było admianić ilhoty ŭsim da adzinaha

«Treba było pierasilić siabie i pajści radykalna — admianić ilhoty ŭsim da adzinaha» — takuju zajavu zrabiła namieśnik kiraŭnika Administracyi prezidenta Biełarusi Natalla Piatkievič 3 maja padčas sustrečy ź biełaruskimi parłamientaryjami i pradstaŭnikami hramadskich arhanizacyj. Mierapryjemstva było arhanizavana pa inicyjatyvie Administracyi prezidenta i Pałaty pradstaŭnikoŭ dla abmierkavańnia prajekta zakona «Ab dziaržaŭnych sacyjalnych ilhotach, pravach i harantyjach dla asobnych katehoryj hramadzian».

«Ja nie čakaju ad vas razumieńnia. Dovadaŭ pa pazbaŭleńni lhot znajści niemahčyma, — skazała N.Piatkievič. — Nie ad vialikich hrošaj, nie ad dobraha žyćcia dziaržava ekanomić. Siońnia treba padtrymać nasielnictva ŭ suviazi z pavieličeńniem cen na enierharesursy. Možna zachavać ilhoty, ale my adpaviedna atrymajem žyroŭki ŭ try‑čatyry razy bolš».

N.Piatkievič padkreśliła, što ŭ Biełarusi na praciahu apošnich dvuch hadoŭ idzie vielmi aktyŭnaja rabota pa likvidacyi lubych ilhot i pryvilej. Pavodle jaje słoŭ, pry padrychtoŭcy zakonaprajekta razhladaŭsia varyjant admieny ŭsich ilhot dla lubych katehoryj hramadzian. «Ale vyrašyli pajści paetapna i zachavać ilhoty, źmianiŭšy da ich padychod», — skazała namieśnik kiraŭnika Administracyi prezidenta. Jana vykazała mierkavańnie, što pry pryznačeńni lhot pavinny być dva kryteryi — adrasnaść (tamu, chto zarabiŭ hetuju lhotu) i vybiralnaść (dapamoha tolki tamu, chto vielmi vostra maje patrebu).

N.Piatkievič adznačyła, što zaraz raspracoŭvajecca «vielmi padrabiazny miechanizm» pradastaŭleńnia adrasnaj sacyjalnaj dapamohi. «Zaraz adrasnuju dapamohu realna atrymać vielmi składana, — skazała namieśnik kiraŭnika Administracyi prezidenta. — Miechanizm adrasnaj sacyjalnaj dapamohi pavinien pamianiacca, i pamianiacca vielmi radykalna. Vypracoŭvajecca dakładny, prazrysty, debiurakratyzavany miechanizm atrymańnia dapamohi, kab tyja, chto sapraŭdy maje ŭ joj patrebu, mahli atrymać jaje, nie zaležačy ad samavolstva čynoŭnika. Miechanizm ahulnych ilhot budzie zamienieny adrasnaj dapamohaj».

Pavodle słoŭ N.Piatkievič, hrošy, jakija vyzvalacca ad uparadkavańnia lhot, pojduć na realizacyju dziaržaŭnaj prahramy «Dzieci Biełarusi». «Zekanomlenyja hrošy nie razmyjucca ŭ biudžecie. Kožnuju kapiejku patraciać metanakiravana», — zapeŭniła namieśnik kiraŭnika Administracyi prezidenta.

Jana taksama paviedamiła, što paśla admieny lhot dziaržava zekanomić kala adnaho miljarda, ale pry hetym nie stała ŭdakładniać rubloŭ ci dołaraŭ.

Na prapanovu pradstaŭnikoŭ hramadskich arhanizacyj vynieści zakonaprajekt na ŭsienarodnaje abmierkavańnie N.Piatkievič zajaviła: «Prajekt zakona na ŭsienarodnaje abmierkavańnie vynosicca nie budzie».

Jak paviedamiŭ BiełaPAN staršynia pastajannaj kamisii Pałaty pradstaŭnikoŭ pa pracy, sacyjalnaj abaronie, spravach vieteranaŭ i invalidaŭ Siarhiej Kamianiecki, deputaty płanujuć razhledzieć zakonaprajekt ab ilhotach na plenarnym pasiadžeńni siesii ŭ kancy maja.

Taćciana Karaviankova, BiełaPAN

• 0
• 0
• 0
• 0
• 0
• 0
• 0
• 0