Na vybarach u harsaviet ułada stavić na medykaŭ, pedahohaŭ i čynoŭnikaŭ.
| Iłona Ŭrbanovič-Saŭka (BNF) kinuła palčatku staršyni Mienskaha harsavietu |
Ciapierašniamu staršyniu harsavietu Ŭładzimieru Papkoŭskamu, jaki balatujecca ŭ zamožnaj Staravilenskaj akruzie, kinuła palčatku Iłona Ŭrbanovič-Saŭka (BNF), kiraŭnica pres-słužby Biełaruskaj asacyjacyi žurnalistaŭ. Na minułych vybarach Papkoŭski ŭ hetaj samaj akruzie pieramoh ŽESaŭskaha načalnika, siabra «Narodnaj hramady». Spn.Urbanovič-Saŭku heta nie pałochaje. Rychtavać kampaniju joj dapamahajuć muž, movaznaŭca Źmicier Saŭka, i 8-hadovaja dačka Karalina. Treci pretendent, mašynist z farforavaha zavodu Ŭładzimier Levandoŭski (KPB), vyhladaje ŭ hetaj akruzie na aŭtsajdera.
Takija ž maładyja supierniki i małaja kolkaść kankurentaŭ u inšych kandydataŭ-čynoŭnikaŭ. Namieśniku kiraŭnika Partyzanskaje rajadministracyi supraćstaić 26-hadovy i «časova biespracoŭny» Vadzim Kanapacki z BNF. Namieśniku kiraŭnika Pieršamajskaje — 23-hadovy ślesar Maksim Trubač (ŁDP). Namieśnicy kiraŭnika Centralnaje — 33-hadovy lider Asacyjacyi maładych palitykaŭ Alaksandar Cynkievič (AHP). Jašče dva kiraŭniki rajonnaha ŭzroŭniu majuć supiernikami vyłučencaŭ ŁDP.
Typovaha kandydata ad «partyi łukašenkaŭcaŭ» lohka vyličyć pa tych akruhach, dzie sam-nasam z adnym praciŭnikam iduć lidery apazycyi.
Adnamu ź lideraŭ BNF Alesiu Bialackamu supraćstaić biespartyjnaja Iryna Žarykava, namieśnica hałoŭnaha doktara 27-je palikliniki (Karbyšaŭskaja akruha). Što cikava, jana taho ž hodu naradžeńnia, što i Bialacki. Pravaabaroncu Siarhieju Curku (BNF) procistaić hałoŭny doktar 1-je palikliniki (Zasłaŭskaja akruha). Veterancy BNF Valancinie Tryhubovič — dyrektarka SŠ№162 (Anharskaja). Viadomamu jašče pa Biełaruskim Zhurtavańni Vajskoŭcaŭ Siarhieju Čysłavu — hałoŭny doktar 8-j dziciačaj palikliniki (Jasieninskaja). Jurystcy Raisie Michajłoŭskaj (BSDP «Narodnaja hramada») — hałoŭny doktar kansultacyjna-dyjahnastyčnaha centru (Słabadzkaja). Michaiłu Hančaryku (BSDP-NH) — dyrektar SŠ №150 (Masiukoŭščynskaja). Navukoŭcu Hienadziu Praśniakovu (PKB) — hałoŭny doktar 1-j kliničnaj bolnicy (Kalininskaja). Hałoŭnyja daktary, pedahohi, vajskoviec, dva dekany, rektar, dyrektary PTV i «Kieraminu» supraćstajać siabram ŁDPB, PKB, Partyi pracy, AHP jašče ŭ 10 akruhach.
Lider inicyjatyŭnaje hrupy Siamiona Domaša na vybarach 2001 h., juryst Jaŭhien Łabanovič (AHP), jaki sabraŭ u svaju padtrymku až 3500 podpisaŭ, pastaviŭšy, vidać, rekord hetaje kampanii, taksama maje samym surjoznym supiernikam u svajoj Malinaŭskaj akruzie dyrektarku himnazii №192.
Haračaja kankurencyja čakajecca i ŭ Čyhunačnaj akruzie. Tam sakrataru ŭpravy BNF Alaksieju Kavalcu i historyku Ninie Stužynskaj (namieśnica staršyni BSDP-NH) budzie supraćstajać najpierš biespartyjny dekan adnaho z fakultetaŭ Universytetu kultury. Mikoła Statkievič užo zaklikaŭ A.Kavalca źniać kandydaturu na karyść svajoj namieśnicy.
Inšaja składanaja akruha — Uruckaja. Eks-deputat Viarchoŭnaha Savietu Pavał Znaviec ź niezarehistravanaj ASDP budzie tut spračacca ź inšym sacyjał-demakratam, ale z Narodnaj Hramady, Alaksandram Arastovičam, i tryma biznesoŭcami.
Nadziva mała idzie biznesoŭcaŭ i haspadarnikaŭ. Siarod ich zaŭvažnyja dyrektary handlovych damoŭ «Parkbroje» Siarhiej Piharaŭ i «Łukojł» Uładzimier Kruk, dyrektar ahienctva nieruchomaści «Dzinas» Viktar Šaniukievič. Usie troje jaŭna ad łukašenkaŭcaŭ, bo majuć vyklučna «partyjnych» kankurentaŭ. Vostraja kankurencyja čakajecca ŭ Lubimaŭskaj akruzie, dzie synu byłoha premjera BNR Jaŭhienu Kałuboviču (BNF) i namieśniku staršyni AHP Siarhieju Alfieru ad uładaŭ budzie supraćstajać biznesoviec Hienadź Litvinaŭ.
Łukašenkaŭcy sfarmavali svaju partyju z čynoŭnikaŭ, pedahohaŭ i medykaŭ. Hetyja try sacyjalnyja hrupy zaležać ad dziaržbiudžetu, najmienš schilnyja da farmavańnia łabisckich hrupovak i, u adroźnieńnie ad biznesoŭcaŭ i siłavikoŭ, nie źbirajucca zmahacca za ŭładu. Jość i toj faktar, što jany najmienš źviazanyja z Rasiejaj.
Sustrečy sam-nasam kandydataŭ ad apazycyi i ad ułady dazvolać narešcie prajaśnić papularnaść tych i druhich. Adsutnaść u biuleteniach lideraŭ demakratyčnych siłaŭ i nieprezentavanaść apazycyi ŭ vybarčych kamisijach pieratvaraje takija sustrečy ŭ bai pamiž supiernikami roznych vahavych katehoryjaŭ. Ale i Davidy, zdarajecca, pieramahajuć Halijafaŭ.
Mikoła Buhaj
Kamientary