Пяць фактаў пра Надзею Скардзіна

Беларуская спартсменка стала трэцяй у індывідуальный гонцы на сочынскай Алімпіядзе.

Вырасла ў шматдзетнай сям’і

У Надзеі два браты, а таксама чатыры сястры. Адна з сясцёр Сафія займалася лыжнымі гонкамі. Самая малодшая — Марыя — крыху пагуляла ў тэніс. Аднак самым спартыўным у сям’і яна называе пляменніка Сцяпана, які гуляе ў футбол. Кажа, што ў хлопчыка вялікая будучыня.

Радзімай лічыць дзве краіны

На пытанне, кім Надзея сябе лічыць больш, беларускай ці рускай, біятланістка адказвае, што абедзве краіны для яе родныя. Яна нарадзілася ў Санкт-Пецярбурзе, але апошнія дзевяць гадоў бегае менавіта за Беларусь.

«З горадам я вызначылася. Мой родны горад — Санкт-Пецярбург. А так — я і руская, і беларуска. «У Беларусі людзі нейкія дабрэйшыя. Гэта я заўважыла, калі прыехала ў Піцер і зашла там у метро. Усе нейкія злыя, засяроджаныя. Беларусы больш разняволеныя».

Прыйшла ў біятлон з лыжаў

Цяжка паверыць, але Надзея не заўсёды займалася з вінтоўкай. Цяпер яна кажа, што «стральба — гэта кайф». У біятлон Скардзіна прыйшла з лыжных гонак, дзе ў яе не ўсё клеілася. Нават збіралася скончыць спартыўную кар’еру.

Паколькі паспрабаць сябе ў біятлоне прапанаваў беларускі трэнер Захараў, то і выступаць яна пачала ў складзе нашай каманды. Біятлонам у Расіі Скардзіна не займалася ніколі. Фактычна вырасла спартсменам высокага класа менавіта ў нашай краіне.

Праблемы з вачыма

Цяпер жа Надзея — адна з самых трапных біятланістак свету. У студзені яна ўсталявала сусветны рэкорд, калі прайшла сямнаццаць гонак без пудла.

Асабліва гэта ўражвае, калі ўзгадаць, што Скардзіна мае хваробу вачэй — астыгматызм, пры якім зрок горшае. «Хвароба з’явілася, бо я часта страляла і вочы часта былі напружаныя, зрок моцна пагоршаў за кароткі перыяд», — казала Надзея. Потым яна зрабіла аперацыю, аднак дактары не абяцаюць, што хвароба ўжо ніколі не вернецца.

Мініятурная

Біятлон — гэта зусім не спорт вялікіх людзей. Рост Надзеі 160 см, а вага — 50 кілаграм. Пры гэтым яна нават не самая маленькая біятланістка, немкі Хенкель і Гёснэр яшчэ меншыя.

Сваімі хобі яна называе пляжны валейбол, а таксама… вязанне. «Сам працэс выдатна супакойвае. Вяжу што-небудзь нескладанае — рукавічкі ды шкарпэткі для пляменнікаў».

На зборах яна жыве ў адным пакоі з Дар’яй Домрачавай.

• 0
• 0
• 0
• 0
• 0
• 0
• 0
• 0