Пасля няўдалага скоку ў возера 19‑гадовы беларус аказаўся ў інвалідным вазку — ён знайшоў сябе ў стварэнні касмічных свяцільнікаў ФОТЫ
Антону Біндзюкову 24 гады. У 19 ён, студэнт другога курса, няўдала нырнуў у возера і ўдарыўся галавой аб дно. Як вынік — пералом пятага шыйнага пазванка, траўма спіннога мозгу і 1‑я група інваліднасці.
Калі хлопец апынуўся ў інвалідным вазку, ён вымушана змяніў ранейшыя планы стаць інжынерам і знайшоў сябе наноў — цяпер ён стварае сваімі рукамі свяцільнікі-месяцы і вядзе блог пра сваё жыццё.
Антон паходзіць з Гомельшчыны, з гарадскога пасёлка Карма. У дзень трагедыі ён, тады яшчэ студэнт Беларускай сельскагаспадарчай акадэміі, паехаў з сябрамі на возера. Калі Антон няўдала скочыў у ваду, то не змог падняцца з дна сам, яго даставаў аднагрупнік.
У бальніцы хлопец да апошняга быў упэўнены, што проста зламаў шыю, таму адновіцца і зажыве ранейшым жыццём. Але адчувальнасць ног так і не вярнулася — Антону прыйшлося перасесці ў інвалідны вазок і перабрацца да бацькоў.
«Першы год пасля траўмы я не разумеў, як жыць далей, адмаўляўся выходзіць на вуліцу ў такім стане. Казаў: «Ну вось аднаўлюся — і тады…!» — згадвае малады чалавек.
З часам прыйшло прыманне сітуацыі. У гэтым у тым ліку дапамагло тое, што Антон пачаў весці блог і дзяліцца там момантамі сваёй рэабілітацыі і пошукаў сябе — у тыктоку на яго падпісаныя амаль 50 тысяч чалавек.
На хобі са свяцільнікамі, якое паступова стала прыносіць грошы, маладзёна натхніла прагледжаная перадача пра палёт на Месяц. Давесці ідэю да розуму дапамог Pinterest.
«Першы Месяц я стварыў для сябе, а потым вырашыў паказаць людзям — можа, яшчэ каму спадабаецца», — расказвае рамеснік.
Свае Месяцы Антон стварае з драўлянай базы і тэкстурнай пасты для рэльефу — усё гэта цалкам ручная праца, якая даецца хлопцу няпроста: дробная маторыка для кісцяў рук пасля траўмы — той яшчэ выклік.
Спачатку Антон не верыў, што яго вырабы будуць прадавацца, але дзякуючы рэкламе ў Threads заказы пайшлі ўгару. Хлопец аформлены як самазаняты, і тое, што ён можа зарабляць сам, надае яму ўпэўненасці ў сабе і не дае падаць духам.
Антон марыць, што яго прыбытак дапаможа хутчэй даўладкаваць безбар’ернае асяроддзе ў кватэры і на лецішчы, каб быць менш залежным ад дапамогі бацькоў.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары