У 7‑й спецбрыгадзе ўнутраных войскаў змянілі камандзіра і ідэолага — неўзабаве пасля праверкі боегатоўнасці
Брыгаду два тыдні правяралі па даручэнні Лукашэнкі ў прысутнасці прадстаўнікоў Дзяржсакратарыята Рады бяспекі.
У 7‑й асобнай спецыяльнай міліцэйскай брыгадзе ўнутраных войскаў МУС (вайсковая часць 5524, Віцебск) адбыліся істотныя кадравыя змены.
У канцы верасня аднамомантава страцілі пасады камандзір брыгады Аляксандр Усманаў і намеснік камандзіра па ідэалагічнай рабоце Раман Паляшчук.
44‑гадовы палкоўнік Аляксандр Усманаў — спадчынны вайсковец. Род мае татарскія карані, у палкоўніка адрас электроннай пошты пачынаўся з «Усманаў-Татарын».
Яго бацька, падпалкоўнік Андрэй Абдурахманавіч Усманаў у свой час трапіў на службу ў Полацк. Ён з гонарам адзначаў, што выслуга дынастыі складае ўжо 300 гадоў і што Усманавы ўнесеныя ў Кнігу гонару ўнутраных войскаў Расіі.
Аляксандр Усманаў скончыў Вайсковую акадэмію Беларусі, у 2019 годзе стаў першым намеснікам камандзіра в/ч 5530, а ў 2020‑м узначаліў тую часць. Пасля быў пераведзены ў в/ч 5524 — спачатку стаў першым намеснікам, а ў 2024‑м — камандзірам.
Палкоўніку Раману Палешчуку 45 гадоў. Ён заняў пасаду ідэолага ў 2024 годзе, а перад тым быў намеснікам камбрыга па баявой падрыхтоўцы ў вайсковай часці 3310 — у вайсковым гарадку Аколіца за 20 км ад Мінска. Палешчука нават абіралі там у Астрашыцка-Гарадоцкі сельскі савет дэпутатаў.
Новым камандзірам стаў 39‑гадовы Дзмітрый Еўса. Ён зрабіў кар'еру ў в/ч 3214, быў камандзірам роты ганаровай варты — выносіў дзяржаўны сцяг на парадах. Апошнім часам быў першым намеснікам камандзіра брыгады ў в/ч 3310.
Яго намеснікам па ідэалогіі прызначаны 35‑гадовы пінчук Руслан Шыг. Ён таксама служыў у в/ч 3214, а апошнім часам працаваў ва ўпраўленні ідэалагічнай працы ва ўнутраных войсках. Ён быў адным са стваральнікам вайскова-патрыятычнага клуба «Рысь».
Адметна, што змены адбыліся прыкладна праз два тыдні пасля таго, як брыгаду правяралі на боегатоўнасць. 14 верасня МУС паведаміла, што праверка, якая праходзіла «па даручэнні кіраўніка дзяржавы», скончылася. Публічнай ацэнкі вынікаў праверкі не было.
Разам з тым мяркуецца, што як мінімум Усманаў працягне службу ў галоўным упраўленні камандуючага ўнутранымі войскамі. Наступнае месца працы Палешчука застаецца невядомым.
Цяпер чытаюць
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары