Грамадзянін Беларусі, які ваюе ў «Наваросіі»: Няма беларусаў, усе мы рускія
«Наша Ніва» адшукала яшчэ аднаго грамадзяніна Беларусі, які ваюе на баку «ДНР». Яго імя — Аляксей, яму 33 гады.
— Па тэлефоне тут такія размовы не вядуць — праслушка. Альбо праз інтэрнэт, альбо на месцы, — заявіў Аляксей, пагадзіўшыся адказаць на нашы пытанні. — Але адразу магу не адказаць, бо ў нас павышаная боегатоўнасць. У Наваросіі я з пачатку верасня.
«НН»: У Данецку?
— Цяпер паміж Данецкам і Марыупалем.
«НН»: У якім батальёне?
— 1 Cлавянская брыгада — разведка.
«НН»: Ты сказаў пра павышаную боегатоўнасць. Дык рэальнага перамір’я няма?
— Ну, яно было крыху. А так стральба ідзе ўсюды. Проста цяжкага ўзбраення выкарыстоўваюць мала. Але хутка, відаць, счэпімся надта моцна.
«НН»: Спыніць вайну мірна ўжо не ўдасца?
— Надта шмат нянавісці разліта і крыві.
«НН»: Што канкрэтна цябе падштурхнула паехаць ваяваць?
— Зусім нядаўна мы жылі ў адной краіне і ў нас была супольная гісторыя і шлях. Але нас зрабілі адзін ад аднаго незалежнымі. І пад фашысцкімі лозунгамі пачынаюць мой народ забіваць і кажуць, што так і трэба. Па тэлевізары паказваюць забітых не салдат, а нявінных дзяцей.
«НН»: У цябе беларускае грамадзянства?
— Так.
«НН»: Ведаеш, відаць, што ў Беларусі могуць арыштаваць за наёмніцтва. Вяртацца збіраешся?
— Мне свеціць 15 гадоў. Пачакаю, пакуль усё дакладна не праясніцца.
«НН»: Лукашэнка не падтрымаў «Наваросію».
— Лукашэнка кідаецца паміж Захадам і Расіяй. Толькі ў Расіі — браты, а на Захадзе будуць адносіцца як да халопаў.
«НН»: А што думаеш пра беларусаў на баку Кіева?
— Рыхтуюцца зладзіць тое ж самае і ў Беларусі.
«НН»: Ты служыў у Мар’інай Горцы. Ты не першы беларус, які ваюе на баку «ДНР», а службу праходзіў у частцы 89417. Супадзенне ці там такія настроі?
— Рыхтуюць там добра. Добрая база для далейшага развіцця.
«НН»: За што ты ваюеш? Якім вынік усяго ўяўляеш?
— Я ваюю за свой народ. За тое, каб не забівалі жанчын і дзяцей. За тое, што ты рускі. Да чаго прыйдзе — і так зразумела: да поўнага знішчэння фашысцкага рэжыму ў Кіеве. І толькі так.
Фота з сацыяльных сетак.
«НН»: Чаму ты называеш сябе рускім?
— Усе мы рускія. Яны падраздзяляюцца на велікаросаў, маларосаў і беларусаў. Так лічыла каталіцкая царква ў ХХ стагоддзі. Таму ва ўсім свеце нас лічаць рускімі. І яны надта рады, што мы паміж сабой ваюем.
«НН»: Беларусь лічыш часткай «рускага свету»?
— Калі мы былі адной краінай, і некалькі здраднікаў развалілі яе, і мы раптам сталі незалежнымі, то гэта не азначае, што мы розныя народы з розным мінулым. Колькі палітыкі ні выдумляюць сваю гісторыю, у нас карані адны і будучыня адна.
Ва Украіне загінула 24-гадовая беларуская добраахвотніца Марыя Зайцава20
Каментары