Дзяржорганы і дзяржарганізацыі змогуць рэгістраваць свае сайты ў зоне «.бел»
Урад Беларусі зацвердзіў змяненні ў палажэнне аб парадку функцыянавання сайтаў дзяржаўных органаў і арганізацый, зацверджанае пастановай № 645 ад 29 красавіка 2010 года.
Як вынікае з пастановы Савета міністраў № 391 ад 8 мая 2015 года, цяпер дзяржаўныя органы змогуць рэгістраваць даменныя імёны ў зонах «.бел», «.gov.by» або «.mil.by», дзяржаўныя арганізацыі — у зонах «.бел» і (або) «.by». У папярэдняй рэдакцыі палажэння зоны «.бел» не было.
Пастанова Савета міністраў № 391 ад 8 мая 2015 года апублікавана 12 мая на Нацыянальным прававым інтэрнэт-партале і набыла моц.
Нагадаем, рэгістрацыя даменаў у кірылічнай зоне «.бел» стартавала ў Беларусі з пачатку сакавіка. Гэта прадугледжана загадам Аператыўна-аналітычнага цэнтра пры прэзідэнце ад 26 лютага 2015 года № 16 «Аб некаторых пытаннях рэгістрацыі даменных імёнаў».
Пры гэтым устаноўлена, што прыярытэтная рэгістрацыя даменных імёнаў у зоне «.бел» ажыццяўляецца з 1 сакавіка да 1 кастрычніка 2015 года.
У межах першага этапу (да 31 мая) рэгістратар ажыццяўляе прыём заявак на прыярытэтную рэгістрацыю даменных імёнаў у зоне «.бел» ад праваўладальнікаў фірменных найменняў, таварных знакаў (знакаў абслугоўвання), геаграфічных указанняў, а таксама дзяржаўных органаў і арганізацый.
У межах другога этапу ажыццяўляецца прыярытэтная рэгістрацыя па заяўках, прынятых у межах першага этапу, пры ўмове ўрэгулявання спрэчак, што ўзнікаюць паміж зацікаўленымі асобамі і (або) дзяржаўнымі органамі і арганізацыямі, а таксама фарміруюцца спісы даменных імёнаў для прыярытэтнай рэгістрацыі па выніках дабрачынных аўкцыёнаў і пачынаецца правядзенне дабрачынных аўкцыёнаў на права прыярытэтнай рэгістрацыі.
Права на прыярытэтную рэгістрацыю даецца ўладальнікам сродкаў індывідуалізацыі ўдзельнікаў грамадзянскага абароту, тавараў, работ або паслуг, зарэгістраваных на тэрыторыі Беларусі, а таксама ўладальнікам таварных знакаў (знакаў абслугоўвання), якія маюць міжнародную рэгістрацыю, што распаўсюджваецца на тэрыторыю Рэспублікі Беларусь, або прызнаных на яе тэрыторыі агульнавядомымі.
Дзяржорганы маюць права ў якасці даменнага імені ў зоне «.бел» выбіраць агульнапрынятае скарочанае найменне, а мясцовыя выканаўчыя і распарадчыя органы таксама могуць выбіраць дамены з улікам геаграфічнага размяшчэння.
Пасля заканчэння двух этапаў прыярытэтнай рэгістрацыі ўсе даменныя імёны ў зоне «.бел», якія не былі задзейнічаны на этапах прыярытэтнай рэгістрацыі, а таксама тыя даменныя імёны, на якія не было атрымана ніводнай стаўкі па выніках дабрачыннага аўкцыёну, выстаўляюцца для свабоднай рэгістрацыі.
Цяпер чытаюць
Стала вядома імя яшчэ аднаго палкоўніка ДФР, арыштаванага КДБ. Ён расказваў сукамернікам, як яго катавалі12
Каментары