Беларусь і Арменія адмовіліся падпісаць выніковую заяву саміту Усходняга партнёрства, бо ў ёй была фраза аб «анексіі» Крыма. Пра гэта паведамляе Reuters са спасылкай на дыпламатычныя крыніцы.
Фраза пра «незаконную анексію» паўвострава Расіяй змяшчалася ў першапачатковым тэксце дакумента. З-за пазіцыі Мінска і Ерэвана, паводле інфармацыі агенцтва, будзе выпрацавана кампрамісная заява, у якім пазіцыі Еўрасаюза і краін — удзельніц Усходняга партнёрства (Украіна, Малдова, Азербайджан, Арменія, Грузія і Беларусь) будуць прадстаўленыя асобна.
У дакуменце, па звестках Reuters, будзе адзначана, што Еўрасаюз асуджае далучэнне Крыма да Расіі. У ім таксама будуць пазначаныя пазіцыі ўсіх шасці былых савецкіх рэспублік, выказаныя імі ў час галасавання ў ААН па рэзалюцыі, якая асуджае крымскі рэферэндум. Тады Арменія і Беларусь былі ў ліку тых 11 дзяржаў свету, што падтрымалі пазіцыю Расіі.
Кампрамісны тэкст заявы будзе выпрацаваны на саміце ў чацвер.
Саміт Усходняга партнёрства адбудзецца ў Рызе 21—22 мая. Чакалася, што падчас яго будзе прынята рашэнне аб бязвізавым рэжыме Украіны і Еўрасаюза.
Цяпер чытаюць
Хто той рэдактар беларускай Вікіпедыі, якога пасадзілі на два гады за «дыскрэдытацыю Беларусі»23
Каментары