Менску муляюць эўрапейскія формулы
Што за фокусы? Нядаўна ж іхні амбасадар Сурыкаў цьвердзіў, што з другога кварталу газ падаражэе ня болей як на 10%. Піша ў сваім блогу Аляксандар Класкоўскі.
Расея пагражае нам "падвойным падвышэньнем цэнаў на газ цягам гэтага году". Такую нечаканую заяву зрабіў Аляксандар Лукашэнка ў інтэрвію РІА "Новости" ды тэлеканалу "Russia Today". Што за фокусы? Нядаўна ж іхні амбасадар Сурыкаў цьвердзіў, што з другога кварталу падвышэньне не перавысіць 10%.
Экспэрт у нафтагазавых пытаньнях Тацяна Манёнак пацьвердзіла мне: 10-адсоткавая столь падвышэньня цягам 2008 году сапраўды прадугледжана двухбаковымі дамоўленасьцямі. Так што расейскі газ сёлета мусіць каштаваць ня болей за $125-129.
Натуральна, гэта палітычная цана, якая ёсьць вынікам закулісных (а таму хісткіх) дамоўленасьцяў кіраўніцтва дзьвюх краінаў. І гэта дае Маскве магчымасьць ціснуць на псыхіку беларускага партнэра, дамагацца сустрэчных саступак у іншых сфэрах. Гэты газавы вагар моцны. Бо зь 1 студзеня наступнага году, у выпадку калі пачне без выняткаў дзейнічаць рынкавая ("эўрапейская") формула, за тысячу кубоў давядзецца выкладваць, паводле папярэдніх падлікаў, ня меней як па $203. А гэта для нашай нерэфармаванай эканомікі капец. І зараз беларускі бок касьцьмі кладзецца, каб дамагчыся перагляду той чортавай формулы. Бадай, менавіта на гэта і скіравана заява беларускага кіраўніка, якую Тацяна Манёнак дыпляматычна назвала "эмацыйнай".
Увогуле ж у згаданым інтэрвію прэзыдэнт ужыў звыклы экспартны варыянт піяру з разьлікам на шараговы электарат суседняй краіны (не прапусьцім на Маскву танкі НАТО і г.д.). Наўрад ці гэты патас паўплывае на прагматычны курс Крамля. Іншая рэч, што, ускручваючы адною рукой цэны энэрганосьбітаў, другой Масква будзе шчодра даваць крэдыты. Лезьце, лезьце ў фінансавую пятлю, браткі-беларусы!
ЗЫ. Увогуле раю палітычным дэгустатарам цалкам прачытаць інтэрвію. Адчуеце шмат нюансаў :)
Каментары