Бёртанаўская «Аліса» выкрыла псіхічныя расстройствы
Цяпер навукоўцы шукаюць іншыя «фільмы-дэтэктары».
Фільм Ціма Бёртана «Аліса ў краіне цудаў» 2010 года і магнітна-рэзанансная тамаграфія дазволілі з дакладнасцю ў 80% вылічыць людзей з псіхічнымі адхіленнямі, перадае Science Daily заяву навукоўцаў Еўрапейскага каледжа нейрапсіхафармакалогіі.
Яскравы і сюррэалістычны фільм дазваляе выявіць нават слабыя сляды расстройстваў псіхікі. Мозг здаровых і хворых людзей па-рознаму рэагуе на стужку — магчыма, людзі па-рознаму ўспрымаюць фільм і па-рознаму ставяць сябе на месца персанажаў.
У межах эксперыменту фільм пад МРТ-назіраннем паглядзелі 32 здаровых чалавекі і 46 чалавек, якія прынамсі аднойчы звярталіся да псіхіятра і праходзілі лекаванне. Даследчыкі выявілі, што асабліва яскравыя адрозненні бачныя ў прадклінні, участку цемянной долі на ўнутранай паверхні абодвух паўшар’яў мозгу, меркавана звязаным з кароткачасовай памяццю, зрокава-прасторавай арыентацыяй, свядомасцю і разважаннямі пра сябе. З даволі высокай дакладнасцю ў 80% атрымалася адрозніць здаровых ад хворых ці некалі хворых.
У бліжэйшы час навукоўцы правераць, ці атрымаецца пабачыць адрозненні падчас прагляду іншых (сюррэалістычных ці звычайных) фільмаў і паспрабуюць даць адказ на тое, ці магчыма ўжываць «Алісу» ў ранняй дыягностыцы псіхічных расстройстваў.
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску6060
Каментары