Шатландскія інжынеры распрацавалі відэакамеру, здольную глядзець за вугал і адсочваць перамяшчэнні схаванага ад яе аб'екта з дакладнасцю да некалькіх сантыметраў.
Навукоўцы не першы раз настройваюць камеры на тое, каб «зазіраць за вугал». Аднак цяпер існуючыя метады патрабуюць нямала часу для выяўлення цэлі — праз што паляванне за аб'ектамі, якія рухаюцца, і адсочванне іх перамяшчэння ў рэальным часе застаецца нявырашанай задачай, паведамляюць інфармагенцтвы са спасылкай на часопіс Nature Photonics.
Новая сістэма, спраектаваная Жэнеўевай Гарапі, Даніэле Фача і іх калегамі з Універсітэта Херыята-Уата, складаецца з двух элементаў: лазера і камеры на аднафатонных лавінавых дыёдах, якая адрозніваецца высокай адчувальнасцю і хуткім спрацоўваннем. Інжынеры «стрэлілі» патокам кароткіх лазерных імпульсаў у бок падлогі, проста перад вуглом. Падлога рассеяла гэтыя імпульсы, якія ў выніку «ўдарылі» па схаваным за вуглом аб'екце — ляльцы з пенапласту вышынёй у 30 сантыметраў.
Імпульсы адбіліся ад аб'екта і патрапілі ў поле агляду камеры. Па часе пралёта светлавых імпульсаў і рассейванні святла сістэма стварае сабе ўяўленне пра месцазнаходжанне схаванага аб'екта. Апарат дазваляе адсочваць перамяшчэнне апошняга з інтэрвалам усяго ў тры секунды, на адлегласці да метра. У далейшым інжынеры плануюць навучыць сістэму рэканструяваць трохмерную форму схаваных аб'ектаў.
Спатрэбіцца новы апарат у сістэмах відэаназірання і для папярэджання сутыкненняў транспартных сродкаў.
Цяпер чытаюць
Адзін з загінулых сёння вайскоўцаў — 26‑гадовы мінчук Кірыл. Што пра яго вядома9
Каментары