Моцныя паўторныя штуршкі разбурылі галоўную дарогу ў італьянскі горад Аматрычэ, які сур'ёзна пацярпеў ад землятрусу за некалькі дзён да гэтага.
Дарога была асноўнай транспартнай артэрыяй, якой карысталіся ратавальнікі і медыкі для аказання дапамогі пацярпелым ад стыхіі. Раніцай у пятніцу быў зарэгістраваны чарговы падземны штуршок магнітудай 4,7. У выніку дарожнае палатно было сур'ёзна пашкоджанае.
У пацярпелых раёнах абвешчанае надзвычайнае становішча.
Паводле апошніх звестак, колькасць загінулых у выніку стыхійнага бедства дасягнула 268. У бальніцах застаюцца 387 пацярпелых у выніку падземных штуршкоў.
Брыгады ратавальнікаў другія суткі працягваюць абследаванне руін будынкаў у разбураных гарадах. Іх праца ўскладняецца перыядычнымі падземнымі штуршкамі, лік якіх ідзе на сотні.
Спадзяванняў на тое, што пад заваламі можа яшчэ заставацца нехта жывы, становіцца ўсё менш.
У той жа час ратавальнікі адзначаюць, што пасля землятрусу 2009 года ў Італіі аднаго з выжылых знайшлі пад заваламі праз 72 гадзіны.
Прэм'ер-міністр Матэа Рэнцы запэўніў, што на аднаўленчыя работы будзе выдзелена 50 млн еўра. Рэнцы таксама абвясціў аб скасаванні падаткаў для мясцовых жыхароў і апублікаваў ініцыятыву «Італьянскія дамы».
Італьянскія СМІ нядаўна раскрытыкавалі стандарты, паводле якіх узводзіліся дамы ў сейсманебяспечнай зоне. Некаторыя з разбураных будынкаў былі толькі нядаўна капітальна адрамантаваныя.
Разам з тым італьянскі прэм'ер папярэдзіў, што было б абсурдам меркаваць, што Італія можа будаваць абсалютна сейсматрывалыя дамы.
Сітуацыя ўскладняецца тым, што пашкоджаныя будынкі, якія выстаялі ў выніку землятрусу, працягваюць разбурацца.
23‑гадовага афіцэра брыгады спецназа асудзілі на 19 гадоў за «здраду дзяржаве»17
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары