Еўрасаюз пацвердзіў свой намер падаць яшчэ больш тэхнічнай дапамогі Дзяржатамнагляду, калі беларускаму рэгулятару гэта будзе неабходна, заявіў журналістам 20 верасня на пляцоўцы БелАЭС намеснік генеральнага дырэктара па энергетыцы Еўракамісіі Герасімас Томас.
«Мы падтрымліваем ужо працу двух экспертаў, якія дапамагаюць рэгулятару, і гатовыя павялічыць аб'ёмы тэхпадтрымкі, — сказаў ён. — Канкрэтная дапамога залежыць ад патрэб рэгулятара. Калі яму неабходная тэхнічная дапамога, каб праводзіць стрэс-тэсты, мы гатовыя яе аказаць».
Як заявіў Томас, 19 верасня эксперты з ліку ўдзельнікаў дэлегацыі Еўракамісіі, якая прыбыла ў Беларусь з двухдзённым візітам, патлумачылі мясцовым спецыялістам, як праводзяцца стрэс-тэсты ў ЕС, а таксама як яны былі арганізаваныя ў Швейцарыі, Арменіі і на Тайвані.
«Цяпер мы чакаем, што беларускі рэгулятар і Міністэрства энергетыкі зноў звяжуцца з намі і паведамяць нам пра графік правядзення работ», — сказаў прадстаўнік Еўракамісіі.
Кіраўнік Дзяржатамнагляда Вольга Лугаўская падзякавала еўрапейскім калегам за візіт. «Яны вельмі падрабязна і паслядоўна патлумачылі нам працэдуры правядзення стрэс-тэстаў у ЕС. Мы атрымалі велізарную колькасць інфармацыі, задалі ўсе пытанні. Вядома ж, мы гатовыя прымаць дапамогу ЕС. Мы зараз вельмі актыўна працуем з еўрапейскімі калегамі. У нас выконваюцца праекты міжнароднай тэхнічнай дапамогі па лініі ЕС. Любая дапамога з боку вопытных калег, безумоўна, карысная», — сказала Лугаўская.
Асноўнай тэмай візіту дэлегацыі ЕК з'яўляецца ацэнка рызыкі і бяспекі атамнай станцыі, што будуецца ў Беларусі, — стрэс-тэсты. Стрэс-тэставанне на АЭС пачалі праводзіць пасля аварыі на японскай атамнай электрастанцыі Фукусіма-1 у сакавіку 2011 года. 23 чэрвеня 2011 года Беларусь далучылася да дэкларацыі аб усёабдымнай ацэнцы рызык АЭС, такім чынам, пагадзіўшыся правесці стрэс-тэсты для атамнай станцыі з улікам патрабаванняў, распрацаваных еўрапейскай групай рэгулятараў ядзерных аб'ектаў. Дзяржатамнагляд распрацаваў дакумент, у якім фактычна паўтараюцца патрабаванні, што выстаўляюцца да правядзення стрэс-тэстаў у краінах ЕС.
14 верасня намеснік міністра энергетыкі Міхаіл Міхадзюк паведаміў, што стрэс-тэсты Беларускай АЭС будуць праведзеныя сёлета ў снежні. «Тыя абавязацельствы, якія на сябе прыняла Беларусь па добраахвотным правядзенні стрэс-тэстаў, мы выконваем. Заключаны кантракт з расійскай арганізацыяй на правядзенне такіх стрэс-тэстаў. Згодна з заключаным кантрактам яны павінны быць праведзеныя ў снежні бягучага года. Расійскім бокам разглядаецца пытанне прыцягнення замежных экспертаў для выканання гэтай працы», — сказаў чыноўнік.
Ён растлумачыў, што на аснове вынікаў тэставання будзе падрыхтаваны нацыянальны даклад, які ў выніку перададуць у Еўракамісію.
Каментары