Вядомы беларускі біятланіст Вадзім Сашурын падзяліўся меркаваннем аб тым, што беларуская біятланістка Дар'я Домрачава вырашыла вярнуцца ў гэтым сезоне ў спорт пасля нядаўняга нараджэння дачкі.
«Дар'я не першая спартсменка, якая не жадае доўгі час сядзець у дэкрэце. Тым больш што яна лідар не толькі беларускага, але і сусветнага спорту. І без Домрачавай нашай камандзе прыйдзецца вельмі складана. Я ёй ад усёй душы зычу новых поспехаў у спорце, але, шчыра кажучы, па-чалавечы не разумею, як маці можа пакінуць такое маленькае дзіця на выхаванне іншым дзеля таго, каб зноў бегаць і страляць. Я сам у мінулым прафесійны біятланіст і ведаю, колькі трэніроўкі і спаборніцтвы патрабуюць часу. І я бацька траіх дзяцей, таму ведаю і пра тое, якой увагі патрабуюць дзеці ад бацькоў.
У мяне на шляху спорт/дзеці пераважылі апошнія, калі жонка другі раз нарадзіла. Лічу, што для жанчыны на першым месцы павінна быць сям'я. Мне, напрыклад, падабаецца нямецкая біятланістка Магдалена Ноер. Прыйшла ў біятлон, стала суперзоркай і ў промнях славы прыгожа развіталася са спортам, каб займацца дзецьмі і сямейнымі справамі.
Тут трэба разумець, што спорт — не ўсё наша жыццё. Са свайго досведу ведаю, што галоўнае пачынаецца пасля сыходу са спорту, хоць, безумоўна, калі ў цябе нешта добра атрымліваецца, то трэба лавіць момант. Зрэшты, нікога вучыць не збіраюся, у кожнага свая галава на плячах. А Дар'і, безумоўна, поспехаў!» — цытуе Сашурына «Народная воля».
Нагадаем, Домрачава стала мамай 1 кастрычніка.
Каментары