Мемарандум аб намерах па стварэнні інтэграцыйнай платформы развіцця заключылі 8 снежня ў Мінску ўрад Беларусі, расійскія «Знешэканамбанк», «Расэксімбанк», а таксама беларускія Банк развіцця і «Банк БелВЭБ». Падпісанне дакумента адбылося ў час сустрэчы першага намесніка прэм'ер-міністра Васіля Мацюшэўскага са старшынёй «Знешэканамбанка» Сяргеем Гарковым.
Як паведамілі ў ААТ «Банк БелВЭБ», дакумент прадугледжвае фарміраванне пераліку інвестыцыйных праектаў дзвюх краін, якія маюць высокі інтэграцыйны патэнцыял, і эфектыўнае выкарыстанне дзейных і новых інструментаў фінансавання працэсу іх рэалізацыі. Будзе праводзіцца праца ў галіне ўдасканалення заканадаўчай базы, якая рэгламентуе інтэграцыйныя працэсы. Прадугледжваецца больш поўнае выкарыстанне фінансава-эканамічнага патэнцыялу Саюзнай дзяржавы для развіцця эканамічнай інтэграцыі Рэспублікі Беларусь і Расійскай Федэрацыі, у тым ліку для фарміравання ўстойлівых міжгаліновых кластараў, арыентаваных на экспарт у трэція краіны.
Для правядзення названай працы распараджэннем прэм'ер-міністра створаны Праектны офіс па развіцці экспарту з прадстаўнікоў беларускага боку з удзелам дзяржаўных органаў Рэспублікі Беларусь. З мэтай эфектыўнай рэалізацыі палажэнняў мемарандума ствараецца рабочая група, у якую ўваходзяць прадстаўнікі Праектнага офіса па развіцці экспарту і «Знешэканамбанка». Каардынацыйныя функцыі ўскладаюцца на ААТ «Банк БелВЭБ».
Васіль Мацюшэўскі зазначыў, што праца ў рамках платформы будзе весціся па некалькіх кірунках — гэта і падтрымка ўзаемнага экспарту паміж Расіяй і Беларуссю, і, што асабліва важна, падтрымка ўзаемнага экспарту ў трэція краіны, адзначылі ў прэс-службе ўрада.
У сваю чаргу старшыня «Знешэканамбанка» сказаў, што стварэнне інтэграцыйнай платформы развіцця дапаможа сумеснай прадукцыі Беларусі і Расіі выйсці на рынкі трэціх краін. «Наша задача — стварыць платформу, калі мы маглі б павялічыць экспарт не толькі паміж Расіяй і Беларуссю, але і выйсці ў трэція краіны з сумеснай прадукцыяй. Такім чынам, гэтая платформа дазваляе павялічыць аб'ём экспарту і, самае галоўнае, стварыць сінергію, аб'яднаць усіх удзельнікаў працэсу. У гэтым інавацыйнасць ідэі», — растлумачыў Гаркоў.
Па выніках студзеня-кастрычніка 2016 года агульны аб'ём інтэграцыйных праектаў, прафінансаваных «Банкам БелВЭБ», склаў 736 млн долараў ЗША ў эквіваленце, што на 88 млн долараў у эквіваленце больш, чым за 10 месяцаў 2015 года. Пры гэтым доля расійска-беларускіх інтэграцыйных праектаў у агульным аб'ёме фінансавання карпаратыўных кліентаў за гэты перыяд склала 47,3%.
Аб'ём крэдытнай падтрымкі «Банка БелВЭБ» прадпрыемстваў Беларусі, арыентаваных на рэалізацыю сваёй прадукцыі ў Расію, за 10 месяцаў 2016 года перасягнуў 210 млн долараў ЗША. На фінансаванне набыцця тавараў, сыравіны і абсталявання з Расіі за 10 месяцаў 2016 года банкам накіравана 286 млн долараў ЗША ў эквіваленце.
Суадносіны аб'ёму прафінансаваных банкам інтэграцыйных праектаў да агульнага аб'ёму расійска-беларускага тавараабароту за 10 месяцаў 2016 года склалі 3,5% (па выніках аналагічнага перыяду 2015 года — 3,2%).
Каментары