Вечарам ва Ўруччы пасажыр праспаў прыпынак, разьюшыўся і… дастаў пісталет.
Аўтобус рухаўся па праспэкце Незалежнасьці недзе ў раёне восьмага кілямэтра. У салёне было чалавек пяць Адзін пасажыр задрамаў, а калі прачнуўся, пабачыў, што прапусьціў свой прыпынак.
Відавочна нецьвярозы, ён рынуўся да кабіны кіроўцы з патрабаваньнямі затармазіць. Той не пагаджаўся. Тады пасажыр дастаў пісталет і стаў размахіваць ім. Кіроўца спыніў аўтобус. Пад пагрозамі ўзброенага парушальніка пасажыры выйшлі на вуліцу. Кіроўца — сьледам.
У нейкі момант ён скарыстаўся замяшаньнем, ускочыў у аўтобус і націснуў на газ. Праехаў мэтраў 30-40 і спыніўся, каб падабраць пешаходаў. Тады буян стрэліў з пнэўматычнага пісталета. Чатыры кулі прабілі заднюю шыбу аўтобуса. На шчасьце, ніхто не пацярпеў.
Затрымалі парушальніка ў той жа дзень. Супраць яго ўсчатая крымінальная справа за асабліва зламыснае хуліганства.
Каментары