«Як ацалець у няштатнай сітуацыі». 24 верасня ў Беларусі пройдзе агульнанацыянальны дзень інфармавання пра бяспеку
24 верасня ў Беларусі пройдзе Адзіны дзень бяспекі. Яго галоўная мэта — навучыць людзей правільна дзейнічаць у выпадку пажараў і іншых надзвычайных сітуацый.
Найперш увага будзе нададзена аб'ектам з масавым знаходжаннем людзей: буйным гандлёвым і гандлёва-забаўляльным цэнтрам, культурным і спартыўным установам, а таксама аб'ектам, дзе знаходзяцца дзеці. Работнікі такіх арганізацый будуць не толькі слухаць тэарэтычныя заняткі, але і адпрацоўваць практычныя навыкі. У некаторых установах, асабліва адукацыйных, у навучанні будуць удзельнічаць супрацоўнікі МНС.
Ва ўсіх рэгіёнах краіны ў месцах масавага знаходжання людзей 24 верасня будуць працаваць 139 тэматычных пляцовак. Там можна будзе атрымаць інфармацыю пра бяспечныя паводзіны і правядзенне Адзінага дня бяспекі.
МНС таксама рэкамендуе кіраўнікам арганізацый праверыць стан супрацьпажарных сістэм, спраўнасць пажарнай аўтаматыкі і тое, ці адпавядаюць патрабаванням шляхі эвакуацыі.
Прадстаўнік МНС адзначыў, што неабходнасць такіх мерапрыемстваў звязаная з рэгулярнымі надзвычайнымі сітуацыямі ў розных краінах. Адным з прыкладаў стаў пажар у 2018 годзе ў гандлёва-забаўляльным цэнтры «Зімняя вішня» ў расійскім Кемераве, пасля якога ў Беларусі пачалі праводзіць Адзіны дзень бяспекі.
У Беларусі з 2024 года да жніўня 2026 года на аб'ектах з масавым знаходжаннем людзей адбылося 34 пажары. Большасць з іх была звязана з парушэннямі ў працы электрычных сетак і абсталявання. Найчасцей пажары ўзнікалі на гандлёвых прадпрыемствах.
У снежні 2024 года пажар адбыўся ў гандлёвым цэнтры «Беларусь» у Віцебску. Агнём было пашкоджана больш за 2 тысячы квадратных метраў. Падчас ліквідацыі пажару ратавальнікі выратавалі 10 чалавек і эвакуявалі з будынка 215 чалавек, у тым ліку 40 дзяцей. Загінулых не было, але пацярпелі 17 чалавек, сярод іх двое дзяцей.
У МНС адзначаюць, што вялікая колькасць ахвяр падчас пажараў часта звязаная з памылкамі пры эвакуацыі, панікай і неадпаведнасцю будынкаў патрабаванням пажарнай бяспекі.
Калі спрацоўвае пажарная сігналізацыя або чалавек заўважае дым, агонь ці іншыя прыкметы ўзгарання, нельга марнаваць час. Неабходна хутка ацаніць сітуацыю і пакінуць будынак, выйшаўшы ў бяспечнае месца.
Калі вядома, што ў будынку засталіся людзі, пра гэта трэба паведаміць ратавальнікам, якія працуюць на месцы, або патэлефанаваць па нумарах 101 ці 112 і паведаміць меркаванае месца знаходжання людзей.
Цяпер чытаюць
Ціханоўскі: Ціханоўскай можна было ў 2020‑м не пабаяцца турмы. І, можа, у беларусаў быў бы шанец121
Каментары