На гэтыя кніжкі я вытраціла каля 30 даляраў. Пасля куплі кніг на 300 і 500 грывень у кнігарнях «Є» даецца дысконтная картка на зніжку, адпаведна, 3 і 5%. Зніжкі таксама назапашваюцца падчас наступных закупаў.
Вярнулася з Луцка з поўнай торбай кніжак. Ва Украіне — выдавецкі бум: дзясяткі маленькіх і вялікіх выдавецтваў друкуюць не толькі мясцовых аўтараў, але і хутка перакладаюць усе асноўныя сусветныя навінкі. Тут і кнігі-бестселеры, і размалёўкі-антыстрэс, кнігі-гульні заходніх ды ўсходніх аўтараў. Я накупляла сабе таго, на што аблізвалася ў рассылцы найбуйнейшай беларускай інтэрнэт-кнігарні oz.by, але шкадавала грошай.
Цэны на кнігі ва Украіне — 50—100 грыўняў, то бок 2—4 даляры. Прычым 4 даляры — гэта ўжо нейкая асаблівая кніга: вялікі фармат, каляровыя ілюстрацыі, малы наклад…
Прытым гэта цэны ў сетцы кнігарняў «Є», якая лічыцца дарагой. У нясеткавых кнігарнях цэны ніжэйшыя. Але «Є» мае свае перавагі. Зручная інфраструктура, заўжды ёсць усе навінкі ўкраінскай і перакладной літаратуры, выдадзеныя ад Харкава да Чарнаўцоў. Маладыя прадаўцы арыентуюцца ва ўсім, што прадаюць, пра кожную кніжку могуць падказаць: на што падобная па духу, які аўтарскі стыль; падкажуць і пра ўзровень перакладу: «Не, гэтага выдавецтва не вельмі добры пераклад, не дацягвае да арыгіналу, дачакайцеся вось гэтага выдавецтва, яны якраз цяпер перакладаюць, мае быць лепшы». Думаю, гэтыя дзяўчаты і хлопцы ідэальна параяць літаратуру — дастаткова назваць ім 3—5 кніг, якія вам падабаюцца.
Едучы з валізамі на вакзал (госпадзе, а якое ж таннае ва Украіне таксі!), я думала пра такі новы від турызму — кніжны турызм. Book-shopping туры.
Думаю, што аматараў чытання сярод нас не так і мала, і аматараў скінуць стрэс, наведаўшы кнігарню, — таксама.
Луцк — найбліжэйшы да Беларусі абласны цэнтр Украіны, 3 разы на тыдзень не вельмі дорага (20 даляраў) туды можна дабрацца прамым аўтобусам з Мінска: у дарозе ноч, і ранняй раніцай вы ўжо ў горадзе Любарта.
Апрача трох цэнтральных кнігарняў, у Луцку цудоўны замак часоў Вялікага Княства, вялізны рынак, дзе прадаюць у тым ліку вышыванкі, заапарк, дзе лемурыха Іруся нядаўна нарадзіла дваіх лемурчанят, музей старажытнай валынскай іконы, Луцкі ўніверсітэт, новыя карпусы якога збудаваныя па праекце Хогвартса… Таксама бук-шопінг можна сумясціць з паездкай на штогадовы музычны фэст «Бандэрштат», сёлета ён пройдзе 4—6 жніўня.
А яшчэ Луцк — першы з гарадоў Украіны па колькасці кавярняў на душу насельніцтва, такая прыемная статыстыка. І ў дадатак — беларусаў там вельмі любяць. «О, з Беларусі? Дык мы ж у вас купляем лён на нашыя вышыванкі!»
Чытаць па-ўкраінску вельмі проста: «и» чытаецца як наша «ы», «ї» па-нашаму вымаўляецца як «йі», «є» — «е» ды «е» — «э». Калі вы ніколі раней не чыталі па-ўкраінску, першая кніга пойдзе не дужа хутка: будзеце перачытваць сказы і падглядаць некаторыя словы ў гугле. Гарантую, аднак, што з другой кнігі прыйдзе паўнавартасная асалода ад чытання і жаданне заваліцца на коўдру для пікніка ды занурыцца хутчэй у тую ўкраінскую кніжку.
«Беларусь перадусім». Што вядома пра 23‑гадовага афіцэра спецназа, якога асудзілі на 19 гадоў за «здраду дзяржаве»9
Каментары