«Пасажырка схапіла мяне за горла — тыдзень хавала сінякі пад шалікам». Як працуецца кантралёрам без формы? ВІДЭА
З 18 ліпеня кантралёры без апазнавальнай формы пачалі працаваць не толькі ў трамваях, але і ў тралейбусах. Усё гэта — у імя адной мэты: скараціць колькасць так званых зайцаў.
Не за гарамі час, калі заўважныя камізэлькі здымуць з сябе і рэвізоры, што віжуюць безбілетнікаў у аўтобусах. Круг магчымасцяў праехацца бясплатна імкліва звужаецца: 240 кантралёраў у Мінску сочаць за табой, заяц!
«Мы разлічвалі, што такім крокам матывуем людзей набываць квіткі ў кіёсках побач з прыпынкамі або ў кіроўцаў. Праўда, пакуль павялічылася толькі колькасць штрафаў: за чэрвень былі аштрафаваныя ў раёне 6 тысяч чалавек, пратаколаў склалі каля 3 тысяч», — каментуе начальнік кантрольна-рэвізорскай службы філіяла агенцтва «Мінсктранс» Юрый Давідовіч.
Мужчына працуе ў структуры 15 гадоў, на пасадзе кіраўніка — тры з іх, і кажа, што да пенсіі тут дакладна не працягне: «Вельмі складана псіхалагічна. Калі з аднаго боку трэба абараняць сваіх супрацоўнікаў, а з іншага — разбірацца і ў скаргах пасажыраў, бо здараецца ўсякае».
Дарэчы, калі не так даўно колькасць жанчын у кантрольна-рэвізорскай службе была каля 90 %, то цяпер іх прыблізна 50 на 50 з мужчынамі.
У адзін з дзён мы адправіліся на працу разам з супрацоўнікамі «Мінсктранс» Святланай і Алесем. На відэа зафіксаваны толькі адзін з экшэнаў той змены.
Пасля мы папрасілі герояў відэа прыгадаць іншыя непрыемныя выпадкі з іх нядаўняй практыкі, і вось што пачулі:
- Кантралёры зайшлі ў транспарт на плошчы Перамогі. Малады чалавек заплюшчыў вочы: прыкінуўся, што спіць. Як толькі аўтобус пачаў пад’язджаць да Кастрычніцкай, хлопец рэзка «прачнуўся» і стаў адпіхваць кантралёра, каб выскачыць на вуліцу (жанчыны ў такіх выпадках любяць у якасці «зброі» ўжываць абцасы). Раз-два-тры — не атрымлівалася. Калі яму прыгразілі выклікам нарада міліцыі, пачаў прасіцца адпусціць: студэнт, няма грошай і гэтак далей. Нягледзячы на першапачаткова агрэсіўны дыялог, усё скончылася мірна.
- Рэвізоры зайшлі ў аўтобус №11, у салоне ехала чалавек 20. На сярэдняй пляцоўцы сядзела жанчына-безбілетніца. Замест квітка ці праязнога яна працягнула кантралёру фігу. Калі ёй пачалі рабіць заўвагі нават людзі, што сядзелі побач, схапіла кантралёра за горла і пачала моцна ціснуць. Міліцыю выклікалі самі пасажыры. Калі жанчына прыносіла свае прабачэнні, яна патлумачыла, што з’яўляецца выхавальніцай ў дзіцячым садку, і да такога стану яе давялі дзеці. Ёй выпісалі вялікі штраф, а кантралёру прыйшлося яшчэ тыдзень хадзіць з шалікам на шыі, каб хаваць сінякі.
- У 10 гадзін вечара на Аранскай трапілася пасажырка без білета: жанчына-выкладчыца, гадоў 35, запэўніла, што зможа аплаціць штраф на месцы, але потым усё ж вырашыла збегчы. Калі яе спрабавалі затрымаць, паспела пакінуць на целе маладога кантралёра сіняк і ранку. Ужо ў міліцыі жанчына абвінавачвала супрацоўнікаў «Мінсктранс» у тым, што менавіта яны ўжылі ў дачыненні да яе гвалт, а ўсе яе дзеянні былі абаронай.
Каментары