Прэзентацыю беларускага талера перанеслі, бо чакаюць новага дэкрэта Лукашэнкі
9 кастрычніка ў Мінску мелася прайсці прэс-канферэнцыя стваральнікаў першае беларускае крыптавалюты — талера. Але падзею перанеслі прыкладна на два тыдні.
«Стваральнікі талера атрымалі інфармацыю, што прэзідэнцкі дэкрэт пад умоўнай назвай «ПВТ 2.0» можа быць падпісаны ў самы бліжэйшы час. І ў ім вельмі вялікая ўвага будзе нададзеная лібералізацыі тэхналогій блокчэйн. Адпаведна, прэс-канферэнцыя пераносіцца на нявызначаны тэрмін — але на ёй, пасля падпісання Дэкрэта, у якасці экспертаў выступяць у тым ліку і распрацоўшчыкі гэтага дакумента», — паведамляецца на сайце Прэс-клуба, дзе мусіла адбыцца прэс-канферэнцыя.
Пры гэтым стваральнікі Талера запэўніваюць, што сама сістэма ўжо працуе і праводзіць усе транзакцыі.
Талер — айчынны аналаг сусветнай крыптавалюты «біткойн». Шмат у якіх краінах выкарыстанне крыптавалюты забаронена законам. Беларуская прававая база ў гэтым кірунку, як плануецца, будзе прапісаная ў дэкрэце «ПВТ 2.0».
Каментары