Каля васьмі мільёнаў тон пластыкавых адкідаў трапляе ў нашы акіяны кожны год. У той самы час чалавецтва выкідае каля 10 мільёнаў тон адзення ў год, паведамляе BBC.
І пластыкавае смецце, якое ўтварае вялізныя выспы ў акіяне, і кіламетры звалак з гніючым тэкстылем незваротна змяняюць хімічны склад нашых экасістэмаў, атручваючы іх на шмат год наперад.
Стваральнік іспанскага брэнда адзення Ecoalf Хаўер Гойенэча вырашыў адказаць на выклік часу. Ягоная кампанія пачала ператвараць пластыкавае смецце сабранае ў Міжземным моры ў ніці для тканінаў, якія надаюцца да выкарыстання ў вопратцы. Гэты праект, «Upcycling Oceans», быў намінаваны на прэмію 2017's Beazley Designs of the Year.
Ecoalf прадае гэтую вопратку пад лозунгам: «Бо ў нас няма планеты Б», і імкнецца стварыць лінію моднага адзення з такой жа якасцю, дызайнам і тэхнічнымі характарыстыкамі, як у найлепшых еўрапейскіх брэндаў.
Хаўер Гойенэча лічыць, што праз моду можна дасягаць адукацыйных мэтаў: «Гэта павялічвае веды людзей пра тое, што адбываецца на планеце, і мы працуем у напрамку дасягнення абсалютна яснай мэты: спыніць нядбайнае выкарыстанне прыродных рэсурсаў каб забяспечыць лепшую будучыню для наступных пакаленняў».
У верасні гэтага году Ecoalf адчыніў сваю філію ў Тайландзе, бо 60 адсоткаў акіянічнага пластыкавага смецця прыпадае на краіны Азіі.
Тайскі праект папулярызацыі экалагічных ведаў праз вопратку мае падтрымку турыстычнага ведамства каралеўства. Аднак Хаўер Гойенэча кажа, што гэтага недастаткова — і што ён марыць пра распаўсюд сваёй ідэі па ўсім свеце.
Цяпер чытаюць
«Яна даўнавата ў Беларусі». Бацька Анжалікі Мельнікавай прызнаўся, што яна жывая і здаровая90
Каментары