Дэлегацыю Беларусі на саміце Усходняга партнёрства ў Брусэлі 24 лістапада ўзначаліць міністр замежных спраў Уладзімір Макей.
Пра гэта, адказваючы на пытанне БЕЛТА, заявіў намеснік начальніка ўпраўлення інфармацыі МЗС Беларусі Андрэй Шупляк.
Прадстаўнік МЗС адзначыў, што беларускім бокам з падзякай успрынята запрашэнне наведаць саміт на ўзроўні кіраўніка дзяржавы,
што адлюстроўвае прагрэс у дачыненнях Беларусі з ЕС і пераход, пасля доўгага перыяду рознагалоссяў, у новы стан ўзаемадзеяння з ЕС як вельмі важным суседам, партнёрам па рашэнні пытанняў міжнароднай бяспекі ў Еўрапейскім рэгіёне і па пашырэнні гандлёвага і інвестыцыйнага ўзаемадзеяння краін ЕС з Беларуссю.
«У дыпламатычнай практыцы візіт на найвышэйшым узроўні, як правіла, з'яўляецца кульмінацыяй узаемных намаганняў бакоў па развіцці супрацоўніцтва, знамянуючы сабой дасягненне глыбокіх сістэмных вынікаў, важных для асноў двухбаковага ўзаемадзеяння паміж адпаведнымі суб'ектамі міжнародных адносін.
Мінск і Брусэль пры актыўным удзеле сталіц краін — членаў ЕС сумесна працуюць над развіццём раўнапраўных ўзаемавыгадных адносін, абмяркоўваючы ўвесь спектр пытанняў узаемадзеяння ў рамках Каардынацыйнай групы Беларусь-ЕС, галіновага дыялогу ў сферы гандлю, беларуска-еўрапейскага дыялогу па правах чалавека і працягваючы ўзгадненне прыярытэтам партнёрства», — сказаў ён.
«Беларускі бок зацікаўлены ў ліквідацыі ўсіх абмежаванняў ЕС, якія азмрочваюць нашы адносіны, у дачыненні да магчымасцяў ўзаемадзеяння з Беларуссю. На парадку дня беларуска-еўрапейскіх адносін належыць з'явіцца перамовам, вядучым да заключэння базавага пагаднення аб партнёрстве і супрацоўніцтве.
Беларусь зацікаўленая ў працягу ўдзелу ва Усходнім партнёрстве ЕС, якое павінна стаць відавочна карысным для грамадзян Беларусі і ЕС, палегчыўшы ўмовы вядзення бізнэсу, кантакты паміж людзьмі, сувязі ў розных сферах, павысіўшы узровень аб'ектыўных ведаў адзін пра аднаго», - падкрэсліў Андрэй Шупляк.
Паводле яго слоў, у цяперашні час Усходняе партнёрства ЕС у большай ступені з'яўляецца фарматам супрацоўніцтва, у якім краіны-партнёры дамагаюцца прызнання еўрапейскай перспектывы.
«Беларусь не ставіць перад сабой такой мэты, аднак выступае за захаванне і развіццё «Усходняга партнёрства» ЕС як інструмента развіцця непалітызаванага ўзаемадзеяння, накіраванага не супраць каго-небудзь, а на вырашэнне агульных праблем і пытанняў, якія стаяць перад народамі і дзяржавамі нашага рэгіёну, — адзначыў прадстаўнік МЗС. — Беларусь, будучы месцам правядзення пасяджэнняў трохбаковай кантактнай групы, высунуўшы ініцыятывы аб спалучэнні еўрапейскага і еўразійскага эканамічных інтэграцыйных працэсаў, пра пачатак шырокага дыялогу пераадоленні існуючых супярэчнасцяў ва ўзаемаадносінах паміж дзяржавамі на нашай агульнай прасторы - у Еўра-Атлантыцы і Еўразіі - бачыла б саміт «Усходняга партнёрства» ЕС як максімальна дэпалітызаванае мерапрыемства, уносячы тым самым уклад ва ўстараненне фактараў раз'яднанасці ў вялікай Еўропе».
«Менавіта гэтыя мэты — далейшае развіццё адносін паміж Беларуссю і ЕС, прагматычнае ўмацаванне «Усходняга партнёрства» ЕС і прыняцце мер, што не паглыбляюць супярэчнасці, а спрыяюць разрадцы напружанасці ў нашым агульным рэгіёне, — з'яўляюцца асновай нашай пазіцыі да саміту Усходняга партнёрства, — рэзюмаваў Андрэй Шупляк.
***
Нагадаем, што сёлета ўпершыню запрашэнне ў Брусэль на саміт УП было адрасавана непасрэдна Лукашэнку.
Папярэднія чатыры саміты прайшлі без удзелу беларускага кіраўніка — Еўрасаюз, які ўвёў санкцыі супраць Беларусі, запрашэнні дасылаў, але даваў зразумець, што прысутнасць Лукашэнкі на саміце непажаданая. Апошні раз, у 2015 годзе, на саміце ў Рызе Беларусь прадстаўляў кіраўнік МЗС якраз Уладзімір Макей.
У канцы мінулага тыдня ў час рабочага візіту ў Мінск віцэ-канцлер, міністр замежных спраў ФРГ Зігмар Габрыэль выказаў надзею, што на саміт у Брусэль ад Беларусі прыедзе менавіта Лукашэнка.
Хочаце жыць доўга — шукайце раён з нармальнымі дрэвамі. Навукоўцы высветлілі, што дрэвы ратуюць ад інфарктаў, а газоны могуць нават нашкодзіць здароўю22
Каментары