Беларусь хоча адгарадзіцца ад Украіны 11-кіламетровым кавальерам. Проціпажарным — у балоце Марочна
Кавальер — дамба з ровам амаль 11 кіламетраў удоўжкі — мае прайсці ўздоўж беларуска-ўкраінскай мяжы ў балоце Марочна. Такім чынам Беллясгас хоча вырашыць праблему лясных, балотных пажараў, што прыходзяць у Беларусь з Украіны, паведамляе Зялёны партал.
У сухім 2015 годзе ў выніку іх выгаралі сотні гектараў. Агонь найчасцей прыходзіў з поўдня, з Украіны.
Кавальер — гэта гідратэхнічнае збудаванне. З двух бакоў — канавы, а пасярэдзіне — дамба, насыпаная з грунту, узятага з канаў. Паколькі той грунт пераважна тарфяны, то кожныя 500 метраў на дамбе будуць насыпацца перамычкі з пяску. Вышыня дамбы будзе да 1,5 метра, шырыня па версе — да 6,5 метра, даўжыня — 10,8 км. Дамба мае прайсці на поўдзень ад сяла Дзераўная Столінскага раёна.
Дамба будзе выкарыстоўвацца і беларускімі памежнікамі. Яна пройдзе за 60 метраў ад украінска-беларускай мяжы.
Беллясгасу выгадныя такія вялікія праекты, бо гэта магчымасць атрымаць вялікае фінансаванне.
Пажары на балотах — праблема, бо гэтая зона ў Столінскім раёне забруджаная, і кожны пажар азначае выкід радыяцыі.
У той жа час любая такая дамба змяняе экалагічны баланс. Таму эколагі б'юць трывогу. На іх думку, дамба разрэжа сярэднюю частку Марочна на два і парушыць гідралагічны баланс.
Мінпрыроды не дало згоды на будаўніцтва аналагічнай дамбы ў Альманскіх балотах, якія маюць ахоўны статус. А вось у Марочне — дазволіла. Таму што тут праектаваная дамба не праходзіць праз заказнік, якім з'яўляецца частка Марочнага.
Цяпер чытаюць
Каардынатара пошукавага атрада «Анёл» пасадзілі за палітыку2
Каментары